《不屬於你的東西就放手》

大部分人似乎都係犯賤嘅生物,愈得唔到嘅嘢就想得到,愈對自己愛理不理嘅人就愈想去接近,我哋都總係覺得得唔到嘅東西特別美麗,對唔屬於自己嘅故事都特別嚮往。於是好多人都拼命去追嗰隻唔會為自己停低嘅風箏,即使沿途跌到損手爛腳,都依然高呼:「不經一番寒徹骨,焉得梅花撲鼻香!」

唔知係咪畀偶像劇薰陶太多,好多人都覺得愛情本身就係阻礙重重,最真摯嘅愛情都要經過一輪攀山越嶺先會得到,又或者深信真愛最後都會感動到對方,大團圓結局。但真實世界嘅愛情,其實可以好簡單,主要係分愛你嘅人同唔愛你嘅人。你硬要去追逐唔愛你嘅人就自然會白忙一場,到最後片體鱗傷都係得個吉。

唔知要經歷幾多傷痛同失敗,人先會學精,先會明白到唔屬於自己嘅嘢強求都無用,唔歡迎自己嘅世界,勉強擠到入去都只係勉強。有時你以為追逐唔屬於自己嘅人只係苦了自己,其實對方都一樣被你追趕到好疲累。愛情唔係打開門做生意,人哋根本無諗住招呼你嘅,你排幾耐隊耐心等幾耐都唔會等到。

港女友Facebook