中秋親戚飯局 5大禮儀令親友對你加分

中秋節講求團團圓圓,相信唔少打工仔今日都可以早收工,趕返屋企同屋企人食餐飯做節、賞月、食月餅兼玩燈籠。作為男/女朋友的你,去另一半屋企做節,又點可以兩手空空呢?而食飯個陣,面對眾多一年先見一兩次的親友,又點可以口啞啞?食完飯,一家大細落樓下玩燈籠,你又點可以因為怕熱而「唔陪玩」?看似一個簡單的聚餐,當中的禮儀絕對係非常高深,一個唔小心隨時「被」留下負面印象。兩口子想未來條路好行少少,不妨參考一下中秋飯局5大禮儀啦!

不能兩手空空

一個飯局十幾廿人,點可能人人送一盒月餅,最好就係買個果籃送比大家,好讓佢地自己分。至於尊貴的「最高領導人」,最好就係比封利是佢,老人家一定開心。

幫手做嘢

即使你個人本身唔太識講嘢/唔太鍾意講嘢,夾餸斟茶等工作可以幫你分散下注意力。如果係屋企飯的話,記得幫手開飯同執嘢,最好自動請纓去洗碗,一定加分不少。

不能一口拒絕「月餅」

飯後總會有食月餅環節,減肥中的女生都要比下面食一小舊,又或襯無人見到塞落男友口中,千萬唔好一口拒絕長輩的好意。

唔好急住走

同長輩食完飯,好多年輕人都會有下半場,但千萬唔好一食完就話趕住走,一定要一齊飲下茶食下月餅先好離開。

同小朋友玩燈籠

飯後一家大細落樓下玩燈籠同猜燈謎,兩口子唔好一味活在二人世界,最好同小朋友打成一遍,顯得你可以融入家中,雖然熱就熱咗少少,忍下啦。

相片來源:cgtnofficial @tumblr