令家庭幸福的因素?研究發現最重要是伴侶關係

「我全家都好幸福喎!」大家一定聽得好多,而事實上好多人都視家庭幸福為最重要嘅願望,人人咁努力返工,都係想家庭好,家人生活快樂滿足。不過成日都話想家庭幸福,實際上主宰家庭幸福感嘅又係咩?不外乎幾大因素,分別係伴侶關係、子女關係、父母關係。

台灣中央研究院心理學教授劉蓉果就透過心理學研究,了解各種關係於家庭中佔幸福感幾多。研究搵咗華人家庭動態資料庫入面嘅數據,加上深入採訪若干家庭,得出唔少有意思嘅研究。首先,家庭關係之中,男女自信強項大有不同,女人最有自信係教育仔女,認為自己可以同仔女維持幸福關係;而男人就對婚姻最有自信,確信自己可以同伴侶有良好關係,對婚姻十分有信心。不過大家記住,以上講嘅係各人嘅自信,做唔做得好又係另一回事。

而根據研究發現,實際上最影響家庭幸福度,就係婚姻關係,即係自己同伴侶嘅關係。兩人感情愈好,家庭幸福感就愈強,否則就算其他兩種關係做得好,亦唔會幸福。另外又發現,男士比女士更重視父母關係、及家庭收入;而女士比男士更重視子女關係。

最後,大家可能最關心嘅係究竟如何維持一個好嘅家庭關係,研究人員指出就係家庭中每一位都要付出,每人都要有自己貢獻,必須自己想方法令自己為家庭付出;適應唔同家庭崗位,做自己崗位要做嘅責任,千萬不能只求他人付出,只求其他家庭成員為自己改變呢。

參考資料:《中華心理學刊》