《仲可以hea,其實好幸福》 - B612

唔知係幾時開始,「拖延症」(Procrastination)慢慢入侵我嘅世界。每一日嘅生活總係充斥住各種各類嘅「唔想做」、「遲啲先」、「唔理啦」……我以為係因為自己個人變得越得越懶,先至會咩都唔願做、咩都拖一輪先講。

後來先發現,其實唔係因為懶,反而就係因為我太勤力,攬咗太多嘢上身俾自己做。


人大咗,要負嘅責任點都多啲。年紀輕都仲可以懶懶閒,但當你知道要好快唔單止要養起自己,仲有一堆細路、高堂、車呀、樓呀等住你,就好似有個倒數計時器咁,每日迫住你進步。起碼唔可以一直停留喺職場新丁嘅水平,要養家唔通靠每年加人工抗通脹咩。


於是喺工作上,你嘅心態已經唔再係新仔任人舞,而係每日都要認認真真準備,唔可以卸膊,好多時放咗工都仲係精神繃緊,掛心住做唔完嘅公事。工餘又想讀書進修吓,增值自己。見到自己嘅生活得返工放工咁枯燥乏味,就越想達成好多其他嘢,迫自己日日睇書、睇電影、睇新聞……當一星期努力過後,終於有得放假,反而特別想搵啲嘢去學、去玩,因為留喺屋企瞓覺好似好對唔住自己咁,結果放完兩日假好似仲攰過平時。

我地好似都對於「不作為」有一種恐懼,驚死俾人話得閒/無用/無嘢叻/成日hea,然後就填滿自己嘅時間表。


諗返轉頭,其實自己嘅生活想點過,根本與人無尤。生活有無意義唔係由人哋話事,而係自己。總有人係工作狂、天生運動員,停一秒都周身唔聚財;亦有人係鍾意慢活,唔鍾意匆忙嘅生活。各人有各人的修行,過一種你自己覺得舒服開心嘅日子就夠喇。


到今日先明白,可以Hea,本身就係一種小確幸。仲有青春歲月同生命可以浪費,先係真正嘅幸福。

***********************************

網絡作家b612 – facebook專頁:b612lpp

(鍾意睇嘅請你去俾個like,支持吓我繼續寫嘢吖!:))

「倘若有一個人對一朵花情有獨鍾,而那朵花在浩瀚的星河中,僅此一朵。那麼,他只要仰望繁星點點,就心滿意足了。於是他喃喃自語:『我的花就在星河的某個角落』可是,這花一旦被羊吃掉了,瞬間,所有星星也將隨之黯淡無光。那你也認為這不重要嗎?」