《份工chur同唔chur,係兩個世界》 —— B612

以前以為long D已經夠難捱,殊不知原來有一種拍拖,係可以仲衰過long D多多聲。

​有種人返工,係朝九晚九,中間無一分鐘係得閒,有時可能兩三點先一手捧住個凍咗嘅外賣飯盒食,一手覆個客……而另一種人返工,係可以一日出入三十次後樓梯呼吸吹水,平均兩分鐘應一次機,每半個鐘就嗌一次悶,五點半開始忙到六點就收工。

如果呢兩種人拍拖,結果……就會同忘年戀呀、異國戀呀、long D呀個啲差唔多 —— 因為佢哋都係各自活喺兩個完全不同嘅世界。

一對情侶啱啱開始,實係機不離手,幾忙都會抽到五分鐘就望吓個電話架啦。到生米已煮成熟飯,你又覺得之前沉迷兒女私情用咗好多時間,要更搏命返工追返晒嚟。忙起上嚟,可能一日都坐唔得低覆幾多次message,只可以循例中午問一句食飯未,六點問句收工未。呢個時候你要面對嘅,就係每兩分鐘畀另一半問一次:「你係咪好忙呀我唔阻你喇」呢類嘅幽怨訊息。然後呢句嘢將會成為你哋每日講得最多嘅嘢。


而且,工作比較輕鬆嘅人,亦唔會理解你講任何關於想升職轉工加人工、公司發展、行業前景嘅話題。再如何忙,以為自己係為咗雙方嘅將來打拼,其實都只係得你一個人單機。直到有一日你發現呢個事實,佢可能已經離你越嚟越遠……

香港人所有嘅問題,都係土地問題。如果樓無咁貴,我唔洗咁搏命搵錢,盲目地發奮忙忙忙其實自私,又點會同另一半有呢種事業上嘅分歧呢?返工chur,真係仲辛苦過long D架。

***********************************
網絡作家b612 – facebook專頁:b612lpp

(鍾意睇嘅請你去俾個like,支持吓我繼續寫嘢吖!:))

「倘若有一個人對一朵花情有獨鍾,而那朵花在浩瀚的星河中,僅此一朵。那麼,他只要仰望繁星點點,就心滿意足了。於是他喃喃自語:『我的花就在星河的某個角落』可是,這花一旦被羊吃掉了,瞬間,所有星星也將隨之黯淡無光。那你也認為這不重要嗎?」