《你最大缺點,就是太善良了》

呢個世界有一種人永遠都帶住天使嘅光環,不論人前人後都係一個大好人,對朋友、對其他人都好善良,呢種人好到大家都覺得做佢嘅另一半一定好幸福。於是做佢嘅另一半就要活喺呢個天使光環嘅陰影下,身邊嘅人成日不忘提醒佢嘅另一半要好好對佢呀,唔好辜負人呀⋯⋯但其實你又知唔知同呢種極善良極純真嘅人一齊,都係一種壓力。

我有個朋友就曾經同天使一樣嘅女仔拍拖,個女仔真係好好,每樣嘢都先諗對方,又好愛對方,其實都無咩好挑剔。不過一齊耐咗,個男仔就發現佢好辛苦,因為佢哋之間每次發生啲咩,全世界都會覺得係個男仔錯,個女仔永遠都係受害人,個個都覺得個女仔咁好咁就得人,一定係個男仔唔愛佢乜乜乜。

雖說兩個人嘅愛情,關其他人咩事先?其他人點講咪由得佢囉。但係個男仔最後都係選擇分手,原因唔只係其他人把口講啲咩,而係個女仔自己都總係擺出一個受害人嘅姿態。每次爭執邊個錯都好,個女仔都會讓步,每次有咩意見不合,個女仔都會聽哂個男仔話,然後個男仔終於忍唔住問:「點解你要咁委屈先?點解唔可以有咩諗法就講,點解下下都要讓步?」

有時候兩個人拍拖,並唔係需要一個yes man,一個咩都話好咩都就哂你嘅人。對方天使般善良真係好難得,但係我哋都只係凡人,需要嘅都係一個有血有肉,有脾氣有諗法有所謂嘅人。可能你會鬧點解要咁犯賤?但兩個人喺埋一齊,唔係就係想要一個同自己有交流有溝通有分享嘅人咩?

港女友Facebook