《你要接受,唔係每個人都會鍾意自己份工》— B612

唔知幾時開始,社會會覺得每個人長大之後都要搵到份好有意義嘅工,或者去追求一個好宏大、至少講出嚟好好聽嘅夢想。

喂,其實唔係份份工都會有意義,亦唔係每個人都會鍾意自己份工架。呢個社會,總要有人做唔同嘅崗位,侍應、洗碗、搬貨、速遞、司機……唔係話職業有高低之分,而係唔可能每個工種都直接對社會有貢獻、對人類文明進步有幫助,你以為大家都係愛恩斯坦或者蓋茨?

而且才能嘅嘢係與生俱來嘅。我天生計數叻又好,畫畫天分高都好,如果生喺埃塞俄比亞都唔見得有用武之地。叻,但無適合可以發揮嘅空間,搵唔到一份可以展你所長嘅工作,或者遇到識欣賞你嘅伯樂,都係無用。

你見到嘅巴菲特、馬雲,只係萬中無一嘅個案。除非你學黃子華話齋,好似李白咁咪「天生佢材(多到)分啲俾你用」囉。否則,好多人終其一生,都只係所謂好「平凡」咁過,唔一定有咩所謂夢唔夢想。

其實人生意義唔一定同工作掛鈎。一日廿四小時,當你八個鐘瞓覺,八個鐘返工,八個鐘食飯沖涼搭車,工作無錯係佔咗你嘅生活一大部分。搵到一份你好鍾意亦覺得有意義嘅工作,咁係你嘅福氣。就算無呢,你都仲有三分之一嘅人生係由自己控制。所以根本唔需要咁執著於「夢想」呢兩隻字,不甘於平凡,一定要跟其他人嘅定義來闖一番事業。只要你自己識得享受生活每個細節,日子其實就已經唔係枉過。


唔洗驚。一個人無夢想,同條咸魚都仲係有分別嘅。

***********************************

網絡作家b612 – facebook專頁:b612lpp

(鍾意睇嘅請你去俾個like,支持吓我繼續寫嘢吖!:))

「倘若有一個人對一朵花情有獨鍾,而那朵花在浩瀚的星河中,僅此一朵。那麼,他只要仰望繁星點點,就心滿意足了。於是他喃喃自語:『我的花就在星河的某個角落』可是,這花一旦被羊吃掉了,瞬間,所有星星也將隨之黯淡無光。那你也認為這不重要嗎?」