做女友都要名正言順 男人唔肯表白直接就拖手?

 

拍拖就一定要男女雙方兩情相悅,好多時合拍嘅男女,一齊只要片刻已經立即有感覺,同時有第六感Sense到對方都同樣對自己有Feel,然後就好快會知對方會接受自己進一步發展。當然要做主動嘅,好多時仲係男仔,提出約會,製造機會,然後拖手,大功告成!咪住!等等住,好似漏咗啲嘢,咁「表白」呢?無錯,對於男人嚟講,要製造機會唔難,要提出約會唔難,去到最後一步要拖手都唔難,最難嘅係要親口講愛的宣言!嗱好多男人認為呢一步可有可無,但偏偏女仔係會記住架,話晒女人最講就係「名份」,唔可以「詐詐帝」就當係,名不正則言不順!究竟男人點解咁怕出口呢?

男人怕老尷

始於生於封建社會,唔似西人下下都「I Love You」咁講到出口,面對愛人從來唔會完全表達出自己感受,所以要告白時更加唔可以好似日本男人咁有勇氣,又大叫又喊咁,對於港男而言,無面呀!

表白失敗好樣衰

男人最怕樣衰面懵,面敗表白失敗呢個老尷場面,希望避免出現,因此斬腳趾避沙蟲,決定直接用行動去表示。不過唔好話唔提,唔表白就直接行動,隨時畀女人話你非禮架!

表白太過時

現代男女關係直接啲,唔會好似以前咁講咩矜特,只要啱感覺,可能認咗幾日已經可以極速一齊,莫講話閃婚;因此好多男人習慣咗呢種快速磨合嘅關係,更加認為表白呢啲太過時,係一齊就一齊,唔使多講。