《前度依家點,關你鬼事咩!》

「前度」係幾多人諗下都會驚到打冷震嘅名詞。好多人心入面都住咗一個難忘嘅前度,即使過咗幾年,幾年無見,明明大家都開始咗新嘅故事,但係「前度」名字一出現,就即刻如臨大敵,好似做錯事嘅小綿羊突然心都虛埋。唉都過咗咁多年,做咩事啫?

係嘅,前度真係一個好特別嘅身份。一個曾經好親密,親密到肉體同心靈都赤裸裸表露過畀對方,而大多數嘅戀情都係不歡而散⋯⋯於是被傷害嗰個又怨恨,傷害人嗰個又心虛。所以我好佩服可以做到「再見亦是朋友」嘅人,能夠同前度單純做朋友,真係一件好了不起嘅事。所以大多數人都係同前度一拍兩散,變做陌路人⋯⋯

因為做朋友好難,做陌路人相對好容易。要去學識放低過去心無雜念同番情人做朋友,係需要好大氣量好大心機,但做陌生人需要嘅努力真係好少,狠心delete就完事。不過所謂嘅陌生人,都係一對帶住過去嘅陌生人,有好多人都係表面上向前走,重新開始,但其實有一隻手指仲牢牢捉緊住往事。好多人仲怨恨緊前度,好多人仲放唔低被前度傷害⋯⋯最後前度就變成自己心裡嘅缺口,連提起都覺得被掏空。

算啦施主。「而既然分開了,何必又想打擾」,過去咗嘅人就留番喺過去,何必為自己嘅生命增添咁多佛地魔?人地依家過得好唔好,人地有無活得比你好,so what?