《十二傳說》林夏薇前男友黃建東:「我曾經係八嚿腹肌小鮮肉」

Cosmopolitan.com.hk

拍咗好耐終於都播嘅《十二傳說》近排都幾有口碑,可能因為大家都好耐冇睇過TVB有靈異片,當然蕭正楠同林夏薇係大家睇嘅重點,但近幾集有一個頗熟悉的臉孔出現,戲份唔多,但喺TVB劇集和網絡都係老是常出現,佢就係飾演林夏薇前男友嘅黃建東,而大家可能唔講唔知,黃建東曾經係130磅,有8嚿腹肌小鮮肉。

▲ Cosmopolitan.com.hk

入TVB 8年 肥咗70磅

現年37歲嘅黃建東,2011年參加香港先生選舉而加入娛樂圈,並簽約TVB成為合約男藝員。當年30歲嘅黃建東絕對㗳得杯落,近6呎高,但只得130幾磅,仲要有八嚿腹肌,堪稱「小鮮肉」!

▲ Cosmopolitan.com.hk

雖然當年香港先生選擇冇攞冠軍,但就得到「演藝潛能大獎」,仲喺陳奐仁手中接過大獎㗎!

▲ Cosmopolitan.com.hk

不過入行呢8年間,黃建東就肥咗近70磅,由本來嘅八嚿腹肌小鮮肉,變咗做一團豬肉,不過唔行靚仔小生路線嘅佢,反而令佢殺出一條血路,靠網絡惡搞片傳紅網上世界,繼而仲有機會一嚐男主角滋味,擔演TVB網劇《降魔的番外篇—首部曲》的男主角古尼一角。

▲ Cosmopolitan.com.hk

▲黃建東其實私下係個斯斯文文嘅靚仔。

▲ Cosmopolitan.com.hk

▲黃建東嘅「代表作」應該就係《PPAP》。

▲ Cosmopolitan.com.hk

▲同埋近期嘅《What time is it?》

▲ Cosmopolitan.com.hk

黃建東雖然俾人定型為行搞笑路線,但其實佢一直都想演認真嘅角色,甚至奸角都想挑戰,奈何佢深明喺網上世界就係要搞笑先引得人注意。不過,正因為靠著搞笑成功出位,人地就只記得佢嘅搞笑,好少人會搵佢做搞笑以外嘅角色,所以佢話有時都幾無奈。

▲ Cosmopolitan.com.hk

美國大學高材生 演大台小角色

大家咪以為黃建東一直行搞笑路線,大台演出機會唔多就係佢背景冇乜料到,其實佢係喇沙畢業,又係美國紐約州立大學佛東尼亞分校,以高級榮譽畢業嘅戲劇系學士畢業生,仲曾經係美國工會演員,仲簽過美國經理人!

▲ Cosmopolitan.com.hk

在美國工作時仲與《色慾都市》嘅女主角 Sarah Jessica Parker合照,掹車邊都叫「荷里活演員」。

▲ Cosmopolitan.com.hk

不過,點解要回流香港?黃建東:「始終係有色人種,喺美國嘅亞洲人角色實在太少了,加上喺美國生活經常受到種族歧視,加上語言障礙,要融入美國人社會,要花好幾年嘅時間,始終心態係格格不入,上堂時經常因為口音而被其他同學取笑。」

▲ Cosmopolitan.com.hk

好多人以為簽到TVB就會一帆風順,但喺大台呢8年間,黃建東一直被安排「大茄」角色,例如《食為奴》九皇子、《忠奸人》郭晉安衰細佬、《降魔的》戀襪癖乘客、《梟雄》黃秋生門……大部分角色可能連名都冇個,更唔好話俾人有深刻印象。

▲ Cosmopolitan.com.hk

演《十二傳說》林夏薇前男友超感恩

明明係美國大學戲劇系高材生,但做咁多年都係做緊「大茄」,雖然而家做《十二傳說》林夏薇嘅前男友,好似講出嚟都幾好聽,但都只係第二個單元故事嘅其中一角,過幾集又會死,戲份甚少。

▲ Cosmopolitan.com.hk

不過黃建東超級樂天:「我呢啲咁嘅身材,又唔係靚仔,竟然可以做到林夏薇前男友,好感恩啦!」

▲ Cosmopolitan.com.hk

佢拍《十二傳說》呢套靈異劇嘅時候,都有遇過怪事:「有場戲係講我要㩒個女仔個頭落水,嗰陣我喺水面見到有個女人塊面嘅倒影,但明明我㩒嗰個女仔個頭係頭頂嚟,冇可能會有塊面啲度。我嗰陣即刻話:『我地拍戲㗎咋,好快走㗎喇!』咁就好似冇事喇…」

▲ Cosmopolitan.com.hk

黃建東好明白娛樂圈嘅運作,明白自己點解會不被重用:「要怪就怪自己入行時已經30歲,有一個先決條件同人爭,如果俾著我係公司監製、老闆、投資者,我都會投資喺年青小鮮肉身上,好似而家公司嗰班『後生仔』咁。」不過黃建東都唔介意,因為:「演員就係無論你係咩出身,就算係香港先生、星二代、富二代都好,大家都係等緊一個時機,唔會一出就會被觀眾接受,都要有作品先會令人深刻,我覺得自己就係等緊呢個時機。」

▲ Cosmopolitan.com.hk

所以黃建東話佢從來都唔介意做「大茄」:「而家去到街上有人認得我,上網又search到我少少作品,我已經覺得好開心。」誠然,呢位演員確實相當努力,就算冇劇拍,佢都會自己諗橋做創作,拍片希望得到多啲觀眾賞識。「我相信公司嘅監製、導演們都需要時間去了解黃建東可以做到咩角色,所以我對於自己每個角色都係期待。」

推薦閱讀:

結婚3周年 林夏薇與富豪老公仍維持熱戀般甜蜜

【白色強人】完全唔似40歲!靚仔醫生黃嘉樂係Sweet爆男友? 入行18年只欠好角色發圍

TVB《十二傳說》揭香港最不思議事件!農曆七月必聽鬼故!



Follow us on:

  • Facebook: CosmoHK
  • Instagram: @cosmopolitan_hk
  • YouTube: CosmopolitanHK