去到盡!

雖然俗語有云「凡事留一線」,但係為咗夢想,一定要去到盡!好似近期好評如潮嘅電影《狂舞派》咁,就代表咗導演黃修平(Adam)嘅電影夢,亦係佢為夢想努力嘅成果。所以今晚我誠邀Adam率領電影嘅男女主角:蔡瀚億(Babyjohn)同顏卓靈(Cherry),去到位於尖沙咀嘅「瀛川串燒居酒屋」,暢談佢哋為咗夢想,可以去到幾盡?

我同3位《狂舞派》台前幕後成員(左至右)Cherry、Babyjohn同導演Adam暢談夢想!

四年功

Adam自07年嘅作品《魔術男》面世後,6年未有新作,其實佢喺08年已經埋首創作《狂舞派》,所以我覺得今日外界對電影嘅好評、掌聲,佢受之無愧。

「喺08年我就開始同拍檔傾呢部戲嘅idea,我哋負擔唔起租office嘅費用,好多時傾劇本都係去茶餐廳,或者係Poly U(理工大學)入面嘅空地。因為我喺嗰度教書,所以有管理員趕我就同佢講我係老師,咁我哋就可以繼續傾。

Adam為心血結晶盡心盡力,值得得到掌聲。

「我成日見到一班人喺學校入面嘅便利店對出嘅空地跳舞,於是就問佢哋原因,先知佢哋係大學dan-so(舞社)成員,而塊空地原來係舞林勝地,世界各地都有dancers特登嚟朝聖。傾完之後,ideas好澎湃,唔使10日就寫咗劇本嘅第一稿,主旨就係夢想。」

哈哈哈!為夢想而戰,我就最欣賞!Adam呢部作品,由撰寫劇本到搵投資者再到上映,經歷近5年,少啲毅力都唔可以成事。「就好似嗰班dancers咁,要有一個好強嘅信念,相信絕處逢生。喺搵投資者嘅時候,有唔少都係不了了之嘅,直到搵到Winnie Tsang(《狂》片監製之一)。」

三點刺身,鮮!

日本番茄酢物($55),夠晒開胃。

豆腐沙律($58),用豆腐配上日式麻醬,係前菜不二之選。

贏口碑

Adam繼續講述佢同Winnie嘅一席話:「我講完成個故事之後,Winnie已經肯投資,因為經歷過之前搵投資者嘅艱辛,我好奇問佢點解咁快就應承我,佢話:『香港電影人會讚人哋做得好拍得好,到自己做嘅時候,未做就已經唔肯去嘗試,唔試過又點知自己做唔到?』

「o依家部戲嘅票房我唔會理,我關心嘅係觀眾睇完,唔覺得係一部爛片,仲會重拾自己嘅夢想,好似拎番牀下底嘅結他出嚟彈咁,就已經足夠。」

Babyjohn(右)喺戲中結合太極、hip-hop,仲有同女主角Cherry(左)談情。

電影好評如潮,除咗劇本、導演以外,演員亦功不可沒,男主角Babyjohn用3個月嘅苦功,變成戲內嘅太極高手,佢喺拍攝期間,仲有一個「私人教練」,「係攝影師鄭兆強先生(杜琪峯御用攝影師),佢係一個真正嘅太極高手,仲會袋錢入我袋,試過我對手伸得太直,佢就停機話:『阿仔,你叫人對手唔好伸直,你就伸直晒,咁邊有說服力呀?』

「之前拍廣告或者做舞台劇,過程同今次好唔同,多得導演同其他對手,教識咗我好多嘢。」

電影獲好評,監製兼投資者之一嘅Winnie(後排左)梗係喜上眉梢。

酒煮肉蟹($328)嘅清酒更加帶出肉蟹鮮味。

瀛川卷($98)係用三文魚籽、海膽、吞拿魚腩等製成嘅創意卷物。

超新星

戲中除咗獨腳舞者Tommy "Guns" Ly,全部演員都要經過試鏡篩選,包括只有19歲嘅女主角Cherry。「《狂舞派》係我兩三年前做casting,嗰時我仲傻吓傻吓去面試,我使盡渾身解數,一邊跳舞一邊介紹自己,我諗可能呢股傻勁同女主角『阿花』好相似,所以我就成為咗戲入面嘅超新星『阿花』。

Cherry係影圈新貴,佢仲有參演過《大追捕》同《迷離夜》。

名模楊崢(後排左)都大讚電影,特別到場為好戲打氣。

「不過,casting之後一直冇聲氣,我以為自己已經落選,點知幾年之後導演真係搵我。呢部戲嘅題材係冷門咗啲,但難得係全本地創作;同埋講夢想,我諗個個都有自己嘅夢想,會容易令人有共鳴。」

Cherry仲話:「我哋成班台前幕後都培養出感情,拍完呢部戲,可以講係達成咗監製、導演同埋我哋一班演員嘅夢想!」

好!我哋就為夢想乾杯!乾!

日本料理其中一個不可或缺嘅環節——壽司。

瀛川黑松露海鮮炒飯($128),飯粒夠乾身,加入帶子、三文魚等海鮮,令人食指大動。

夏日炎炎,加一杯特飲就涼晒!

黑松露立體和牛($380)選用A5和牛炮製,加上黑松露,雙重享受。

瀛川串燒居酒屋

地址:尖沙咀漆咸道53-55號嘉芙中心1樓
電話:2369 1181

東周網 - 去到盡!︰http://www.eastweek.my-magazine.me/index.php?aid=28246