及早認清世界有幾黑暗 教仔一定要同佢睇TVB


幾日前無人留意又突然完咗嘅就係大台嘅音樂頒獎禮,不過同港姐一樣,由於人氣低,好多人根本就唔知發生過;不過今年最多人突然留意嘅係因為「最受歡迎女歌手」,竟然落咗喺菊小姐身上。Who?係呀,成日唱大台劇集歌嗰位菊小姐。當然好多人都會好似吳若希咁大笑,一副「預咗係咁黑暗架啦」嘅心態,但都難免喺社交媒體上造成一股哄動。其實大家又何必上心,講咩「樂壇最黑暗一日」;喂,樂壇有幾時唔黑暗過呢?何況呢個係大台呀。繼我話,各位香港家長要為小朋友好,就更加要多啲陪小朋友睇TVB喇。點解?

識人好過識字
菊小姐得獎,對於大家嘅意義就係話畀大家知,呢個社會係重人脈重後台多過實力。當你太廢無人要無人睇得起咩?有人造個台畀你上就得囉,無獎擺咩?自己頒畀自己就得囉。話定畀小朋友知,等佢哋及早知呢個世界係點玩,想埋堆嘅就埋堆,唔想埋嘅就要預咗加百倍努力。

人無恥則無敵
喺香港,目前嘅玩法係唔驚畀人話唔驚畀人笑,面皮只要夠厚,咩人都耐你唔何。上至高官,下至電視台,只要唔怕樣衰,堅持懶死唔改,就無人奈得你何,前題當然你要後台夠硬啦。家長就可以教識小朋友,有強權無公理呢個理論喇,第時慳返啖氣好過啦。

排斥異己上位
實力唔夠人哋勁,咁點算?好簡單,只要Foul走人哋咪OK。好似大台咁,唔畀四大唱片公司落場玩,嚟嚟去去都係自己人同啲Friend。社會上又何嘗唔係咁黑暗呢,肯企硬做個硬骨頭唔埋堆,好多時都係畀人邊緣化咗,有腰骨都要講代價。揀得呢條路行,就預咗比人艱難十倍!