《另一半對你好唔好,係睇嗌交嗰時》— B612

要對一個人好,其實唔難。心情靚,對住樓下看更、餐廳侍應,要你四萬咁口、唔該前唔該後,唔會有咩問題。撞啱係趕時間朝早返工出門口,佢試吓撳𨋢慢兩秒吖?老公老婆老豆老母都勢係假,你都即刻眼火爆無情講呀。

兩個人拍拖,一開始追求階段當然好sweet,花心思絞盡腦汁氹佢開心,好有耐性,管接管送就不在話下。即使係之後嘅生日情人節聖誕節拍拖紀念日,要早成個月籌備揀禮物、送花送戒指都好,有幾大場龍鳳你都心甘情願。但如果係嘈緊交呢?

嗌得交,就係視嗌贏為己任。你一定係覺得自己啱、對方錯先會同佢嘈。喺你覺得對方理虧嘅前提下,好容易就會頂到好盡,唔俾佢落台。最後會點呢?咪就係贏場交,輸咗個家囉。唔係話兩個人性格相似唔好,但如果次次都係火星撞地球,總有一個人要裝返個質素好啲嘅避震,吸收返大家嘅震蘯啩?吓吓都玩「寧為玉碎」,你哋仲擺得幾多年?

睇一個人有幾錫你,就係呢啲時候。是非對錯、面子尊嚴,夠唔夠你另一半咁重要?早一秒讓步,對方就少一分難過。如果有嘢睇唔順眼,佢當刻會忍住,遲吓先婉轉啲同返你講;當大家都火遮眼,佢肯放低身段,鬧得最狠嗰句吞返落肚,音量降多兩格,三思完再三思,句嘢修飾幾次先講出口;又或者唔理邊個啱唔啱都好,點都氹返你笑先……呢啲就係佢珍惜你嘅表現。

平時對你好當然要知足,但若果大家處於盛怒或低潮之中都仍然處處為你著想,就絕對係一個好伴侶喇。

***********************************

網絡作家b612 – facebook專頁:b612lpp

(鍾意睇嘅請你去俾個like,支持吓我繼續寫嘢吖!:))

「倘若有一個人對一朵花情有獨鍾,而那朵花在浩瀚的星河中,僅此一朵。那麼,他只要仰望繁星點點,就心滿意足了。於是他喃喃自語:『我的花就在星河的某個角落』可是,這花一旦被羊吃掉了,瞬間,所有星星也將隨之黯淡無光。那你也認為這不重要嗎?」