《一周廿Who》:最多人搜尋的健康問題係?

要知道生活喺香港,已經係一件好唔健康嘅事,身體出毛病,「喂,日捱夜捱,好正常吖大佬」。大家估吓最多人搜尋有關「健康問題」嘅關鍵字係咩?心臟病?大腸癌?手足口病……原來濕疹同躁鬱症排喺首位。唔使解釋啦,香港「世界級濕熱」出晒名,而躁鬱症,因為各種因素,越來越多人開始患上情緒病,所以大家除咗自己嘅生理健康,心理健康都好重要㗎!學子華話齋,「剩係身體健康」係好慘的……

(以下為過去4個月的搜尋數據)

第五位:登革熱病徵

「登革熱、登革熱,快快把蚊消滅」,歌就聽得多,但其實登革熱有幾可怕呢?登革熱主要靠伊蚊叮咬傳染人類,香港常見就係成聽嘅「白紋伊蚊」,好似手足口病咁,登革熱基本上而家仲未有針對性嘅治療,而患者發病係可大可小,有啲會自行痊癒,但有時又會引起重症登革熱。

面對啲血「最好味」嘅小朋友,當然係高危人士,難怪咁多家長擔心小朋友畀蚊咬!

想知更多?:睇呢度

第四位:女性腰痛原因

「你有你嘅生活,我有我繼續嘅忙碌……然後已經發現原來你…有腰痛!?」

呢個結果可以推理出,應該普遍係上班族OL女性嘅常見健康問題,有中醫指女性患者中以腰痛為主嘅就佔咗兩成!中醫指主要有幾個原因:1. 腰肌勞損、2.腰椎間盤突出 / 狹窄、3. 骨質疏鬆、4. 更年期婦女。而頭兩個原因不外乎係因為長期坐姿不正確,導致均可導致腰肌勞損而引起腰部慢性隱約痛,所以各位OL唔好剩係顧住做嘢,得閒企起身行下,注意腰部的血液循環通暢。

想知更多?:睇呢度

第三位:手足口病

近期網民搜尋最多關於健康問題嘅第三位就係「手足口病」,呢種病最常見於兒童通常由腸病毒引起,患者通常會出現發燒、口腔潰瘍、手腳出疹及水泡等病徵。最令家長擔心嘅係呢種病可大可小,可能會自己康復,但嚴重的話會引致命嘅併發症㗎!

「手足口病」顧名思義,即係多數係小朋友互相接觸,透過觸摸受污染物件而傳播,所以好易交叉感染,同埋大規模爆發!現時仲未有藥物治療「手足口病」,所以都係保持小朋友免疫力健康,建立衛生意識,就可以減低感染機會喇。

想知更多?:睇呢度

第二位:躁鬱症病徵

近年,開始多咗人關注情緒病(因為多咗好多人有吖嘛!),而躁鬱症更慢慢成為都市病之一,躁鬱症患者情緒起伏不定,有時見佢好似好開心好興奮,但可能佢下一秒就會跌入低谷,係一種殺人於無形嘅情緒病。加上近期有歌手因躁鬱症困擾而自殺,更令都市人關注情緒病。

根據不同研究,指出80%的香港人有唔同程度嘅情緒病,所以大家唔好剩係顧住返工、返工、返工,仲要留意自己同身邊嘅人嘅情緒問題,不竟就算你身體正常行得走得,都要有健康嘅心靈去享受人生㗎!

想知更多?:睇呢度

第1位:濕疹

濕疹,到而家都未有確實科學解釋,醫生就梗係話有得醫,但有幾多人係食咗幾多藥都未必醫得好。濕疹仲要唔係皮膚病咁簡單,患者長期面對皮膚痕癢同潰爛問題,唔單只影響外觀,更有研究指會造成自卑心態,甚至引致焦慮及抑鬱等情緒病!

想知更多?:睇呢度

#一周廿Who