周末性趣:床上小百科 抬不起頭 五大原因

每對情侶好多時都會面對唔同嘅問題,平時相處固然有溝通嘅問題,例如係生活習慣或者性格,不過除咗日常生活嘅問題,喺床上嘅問題可能都唔少㗎,最常見嘅係究竟開燈定熄燈,又或者戴定唔戴,不過有一個比較嚴重嘅問題,就係細佬唔聽話可以點算,今日就同大家搜羅咗細佬唔聽話嘅五大主因,等大家參考吓。

1. 唔集中
唔講唔知,原來分心係會影響細佬可唔可以抬起頭㗎,好似有屋企人係隔離房,又或者個地方隔音差,都會影響起機,所以最好就搵個安心又放心嘅地方先曳曳啦。

2. Condom 恐懼症
有啲男人唔知點解一戴condom 就起唔到機,其實有醫學研究顯示,若男性有呢種情況只需要更長時間去持續刺激,令陰莖維持勃起嘅狀態再用condom ,就無問題。所以當男方要戴condom時,女方不妨一路刺激、挑逗佢啦。

3. 生活習慣
好多研究都顯示,吸煙、飲太多酒同缺乏運動都係起機失敗嘅元兇,另外生活壓力都會影響表現,所以上得床記得要放低公事同煩惱,好好享受啦。

4. 睇太多AV
AV 如果睇得太多,會令人同現實生活中嘅性愛脫離,會幻想AV橋段先係真實,甚至越睇要越刺激先可以令自己興奮,面對實際性生活就覺得投入唔到,自然影響床上表現啦。

5. 骨盆底肌肉
骨盆底肌肉係影響一個人係床上嘅耐力,歐洲泌尿科曾指出只需要12個星期訓練就可以延長勃起時間,有興趣嘅不妨多啲練習。

 

相片來源:Icasais, urlgold @tumblr