《因為兩個人一起,所以有意義》

有個朋友自我識佢以嚟已經係單身,單身好多年嘅佢近日喺度講:「我可以自己一個去睇戲食飯,甚至去旅行,拍拖對我嚟講其實仲有咩必要?」係嘅,單身都一樣可以活得精彩,一個人都可以過得好好,生活得開心,但拍拖嘅最大意義就係:有一個人可以同你分享一切。

拍拖就係咁,有好多嘢其實係可以自己去做,但係總係希望對方喺自己身邊,同自己一齊去分享嗰啲時刻。因為一個再普通嘅時刻,一旦加上咗愛情,就會突然變得有意義。每個人愛上一個人嘅時候都會係咁,每個重要定唔重要嘅moment,都好想對方喺度,食到好味嘅嘢睇到好靚嘅風景,甚至係聽到一首好聽嘅歌,睇到一條好笑嘅片,都會希望分享畀對方。有時見到一間想去嘅餐廳,一個想去嘅地方,我都會希望另一半同我一齊去,唔係因為自己去唔到,而係因為我好享受兩個人一齊去做一件事嘅過程。一齊去發掘新事物,一齊去感受一齊去分享,令到一個普通嘅事一餐普通嘅飯都突然變得充滿意義。

拍拖唔係會帶畀你咩震憾嘅新生活,甚至乎可能同單身時嘅生活可能都係一樣,只係多咗個人同你食飯同你睇戲,同你做番啲一個人都做到嘅嘢⋯⋯但有個人可以分享一切就係愛情帶畀每個人嘅最大幸福。

港女友Facebook