坐飛機突然挨後...本地插畫家細數去旅行3大冇品行為

日前,一名港男乘搭港航客機由日本沖繩飛返香港期間,因前座內地女子突然將椅背挨到最後,將物件推跌哂落地,港男表示因為唔夠位,就兩度推一推佢張櫈,前座故意挨返後並發難,港男解釋「個位好窄」,女乘客反駁「那你挨後就好」,港男認為「做人唔可以咁冇公德心」,但女乘客好激動,堅持「有權挨後」,港男唯有求助空姐,用手機拍下經過時,被對方兩度出手打走其手機及耳機,令耳機故障。

港男將涉事女乘客相片放上網公審,並問一眾網民係咪要報警,但網民對此意見兩極。有人支持港男,認為女乘客有問題,「郁手就一定錯,俾我一定追究到底」、「挨咁後好自私,一啲家教都無」;不過亦有唔少網民批評港男:「今時今日搭飛機將張凳挨後原來都會畀人鬧」、「其實又真係無理由唔畀人挨後,本身座椅設計就係咁」。

其實本地插畫師「觀塘小葉總」早前亦曾製作有關旅行禮儀嘅插圖,其中一幅正正講搭飛機時將座位後背移後嘅現象,插畫師認為「顧已及人」好重要,應先注意身後嘅人或詢問對方可唔可以挨後,認為「短途就盡量忍下唔好挨,長途就睇下咩時機,如果見到周圍都瞓晒,後面果個都瞓左,咁就可以挨後,同埋有風唔好駛盡艃,挨凳唔駛挨到盡。」

此外,「觀塘小葉總」亦有畫出兩幅旅行禮儀嘅插畫,包括「於景點拍照時請勿耽誤太長時間」、「唔好隨便觸碰禁止觸摸嘅商品或物品」,啟發佢靈感去創作呢啲插畫係因為去旅行時,喺景點見到前方嘅人「喪影」,令後面嘅人不停苦等,所以佢希望大家去旅行都有禮儀,唔好咁冇品。

圖片來源:馬鞍山之友FB、觀塘小葉總FB