培養小朋友藝術氣息 畫畫同填色都好重要

仲記唔記得早前「精靈寶可夢」香港區facebook專頁舉辦一個12歲以下小朋友填色比賽,因得獎作品太出色,網民驚嘆「冠亞軍畫到好似CG嘅級數」、「仲靚過官方圖」,質疑作品由家長代筆,而非小朋友作品。

另一邊廂,有比賽則完美示範咩叫小朋友「真」畫作,Google近日公布2018年度「Doodle for Google」賽果,冠軍由來自美國嘅7歲小女孩Sarah Gomez-Lane奪得,畫中恐龍係妹妹嘅創作靈感,仲話夢想係做古生物學家!雖然佢嘅畫功幼嫩稚氣,冇港孩咁叻識得運用景深、混色等高超技巧,但勝在以真誠同埋遠大夢想,成功打動評審。

唔少小朋友都鍾意畫畫,家長要識得欣賞子女畫作,千祈唔好過早追求完美,介意佢哋畫出界,更加唔應該代筆,扼殺佢哋嘅創意!

不過小朋友創意愈多,畫作亦愈多,又唔捨得掉,要儲又唔夠位,以下就分享幾個收藏小朋友畫作嘅有趣方法:

1.畫冊

整畫冊並冇相像中困難,彩色印刷幫到你!不妨每年為小朋友製作一本年度畫冊,亦係送畀爺爺嫲嫲公公婆婆嘅好禮物!

2.gallery

買幾個小畫框,將可愛畫作掛喺牆,無論係客廳或睡房,時刻流露童真。

3.電腦wallpaper

睇厭風景wallpaper,不如將得意作品scan入電腦,製成wallpaper,即時為你工作打打氣!

4.頸鍊

本地有網店為孩童畫作製成頸鏈,令父母可以時刻戴喺身,好似寶貝仔女就係左近咁。

5.毛公仔

外國亦有公司提供類似,只要將小朋友畫作寄予公司,佢哋就會依照畫作製作出一模一樣嘅真實公仔,實質保存小朋友嘅童真、當時嘅喜悅心情。

圖片來源:Doodle for Google、「精靈寶可夢 香港」fb專頁