夫妻相處之道第一大原則 分清楚「投訴」同「評擊」

夫妻就算幾恩愛都好,一段婚姻始終由兩個獨立個體組合而成,任你同伴侶幾夾,總有衝突與磨擦,永無可能終其一世都無為任何大小事情嘈過。美國華盛頓大學心理學教授John Gottman就夫妻關係研究超過40年,目睹過無數夫妻如何由恩愛變疏離,甚至最後離婚變陌路人。

John Gottman總結佢嘅研究,認為破壞婚姻第一大兇手,就係批評(Criticism)。只要出作批評,雙方互信嘅關係就會不斷削弱,雙方嘅感情亦會受損而且係永久性,日積月累下來,一段婚姻就會變得殘破不堪。John認為,夫妻相處貴乎坦誠,有話唔好收埋,但切勿批評,而係應該投訴(Complain)。如何做到?留意以下幾個貼士。

對事不對人

最容易踩入嘅陷阱就係針對個人,大家一定要注意,對伴侶嘅不滿必須係針對事情,例如不滿佢某種行為,然後就住該行為提出改善建議;否則一旦針對個人,用詞難免變得人身攻擊以及傷害對方,反而最後令問題行為變得次要,最後根本就解決唔到任何問題。

情緒必須冷靜

大家都知道,人類接收訊息嘅時候,留意對方神情語氣,比真正嘅內容更重要;所以大家出聲時必須控制自己情緒,盡量冷靜,切勿被情緒操控自己。不過呢點係好需要大家練習,畢竟難免有時候好嬲好沮喪,出現波動情緒亦好正常,所以大家要自省其身,盡量少發脾氣。

別追問已發生的決定

好多伴侶有爭執時,好常聽到一定有「點解你唔XXXX」、「你點解要咁做?」「你頭先究竟諗緊乜?」呢種問題主要都係針對對方做嘅決定並未合乎你嘅期望,但諗深一層,呢類問題只係貶低對方嘅決定,唔認同佢對方做嘅行為,某程度上等如貶低佢嘅智慧。記住,發生咗就由佢,唔好問對方當時點解會咁做。

切勿講「永遠」及「從未」

就算情緒控制好,用詞都要小心,John提醒大家唔好用「永遠」(Always)及「從未」(Never)呢兩個用字,記住你要針對嘅係某一件事;而且用呢兩個詞亦經常會被對方舉例反駁,反而減少咗自己嘅說服力。

最後John就話夫妻之處在乎體諒,兩個人先可以互相融入對方生命,切記就算你投訴對方時,都一定要覺得自己都有不足,唔好全部責任、錯處都推晒落對方身上,婚姻係兩個人嘅事呀。