夫妻買樓落名之爭 永遠係理性與感性之爭

香港地,買樓係人生大事中嘅大大大事,好多夫妻死慳死抵上到車,已經係社會中嘅「成功人士」。買樓既然係人生大事,之後嘅手續一樣至關重要,講嘅就係落名問題。大家都知香港有買樓辣招,任何人買第二層樓就要畀額外印花稅,用意係令炒家有所負擔;對好多有錢人、真炒家,佢哋已經搵到方法,就係用公司名、用子女名等等。真正撕裂緊嘅一群,竟然係夫妻及情侶?

「連X討論區」有男網民就透露自己同老婆結婚2個月,早喺結婚前已經選定咗一個二手單位,近日終於同業主傾掂,可以正式上車。不過問題就嚟喇,因為落名問題,同老婆嘈咗幾次,因為男網民諗住只落自己名,用意係留返老婆個名,否則聯名買的話,就會一齊喪失「首次置業」呢個資格,可以話係白白蝕咗一個名額,日後如果有錢想買多間收租都唔得。老公就咁理性咁去思考,偏偏老婆就係感性思考,只係覺得既然係大家婚後嘅愛巢,而且首期、供樓大家都決定係一半一半,自然應該聯名啦。男網民就話非常頭痛,佢自己甚至提議過,只落老婆名;不過又輪到自己父母反對,而老婆亦都唔同意「唔係貪你層樓,只係想同你一齊擁有我哋屋企。」

目前非常煩惱,一旦順應老婆感性而為聯名擁有,他日打算買多層樓出租,幾乎係唔可能;但如果只係落一個人名,日後可能日日夜夜都會畀老婆埋怨,生活更加痛苦!香港地買樓已經唔容易,原來咁辛苦買到樓,可能係另一個痛苦旅程嘅開始。