夫婦儲錢準備上車 奶奶阻止:留嚟生仔!

香港地,人人生活都離唔開一層樓;好多人努力多年都未見上車希望,但有時真係有上車能力時,面對嘅原來又有其他問題。有位女網民於XX Kingdom討論區發文,指自己同老公34歲,結婚5年,一直都租樓住,亦未有小朋友,因為要儲錢上車買樓。近幾個大家計過似乎夠錢,亦四周睇過樓,亦有心儀嘅單位。正當老公搵埋奶奶諗住同佢講之時,奶奶竟然好大反應「你用晒啲錢買樓,咁點生仔?」奶奶阻力極大,堅持要佢哋繼續租樓並生仔「啲錢留嚟畀個仔讀書好過,買香港樓有咩好?」

老人家抱孫心切,大家都明白,但兩公婆一直都唔生仔就係覺得無樓不成家,生小朋友第時要佢自己儲錢去買樓,好似等如害咗佢;於是希望買層樓,起碼他日小朋友長大後唔使擔心住屋問題。老公都有同奶奶溝通,話唔係唔生仔,只係先買樓安定好後就全力造人。不過奶奶就好Mean:「新抱年紀都唔細,仲等?等我死定等佢生唔到?」女網民就話聽到好傷心,唔明點解兩夫婦自己死慳死抵儲錢,一分錢都無問過屋企攞,但連點用都唔可以自己決定。

網民就兩方面反應都有,當然有唔少人支持女網友,話暫時樓市下滑,上車的確係好時機,造人遲一、兩年都無所謂,唔差太多;不過竟然都有好多人贊成奶奶所講,就係「香港樓根本唔值得買」,認為樓呢啲身外物,點會及得上小朋友重要。大家又支持邊個?