失婚40歲中女同新男同事傾計 被唱「想食小鮮肉」

愛情從來都係一門高深學問,有人話要用幾多十年先真正搵到一個同自己真心相愛嘅另一半,中途都唔知經過幾多失敗同挫折,真愛確實得來不易。近日高X討論區有位女網民話自己40歲,5年前同前夫離婚,一直都係單身,本身有諗過再搵另一半,但隨著年紀漸大已經無再主動去搵。近日公司嚟咗個新男同事,30歲出頭,朝氣勃勃走陽光路線。原本兩個人都無咩接觸,但有一晚OT,全公司只剩佢哋兩個,男同事好主動咁同佢傾計,大家一傾就傾咗1個鐘,亦講埋畀佢聽自己係失婚40歲中女。當晚女網民話個心突然一暖,有少少動情,唔係因為覺得男同事外在吸引,係純粹好耐無異耐關心過自己,隨即令自己心如鹿撞。

故事去到呢度,大家係咪以為又係一個忘年戀、姊弟戀故事?錯喇!轉頭過咗幾日返工,女網民居然被老細叫入房,話新嘅男同事有意無意咁同人講,話女網民對佢有意思「想食小鮮肉」。老細雖然無責備,但就提佢「小心唔好喺公司搞呢啲嘢」。女網民非常震驚,原來自己「失婚40歲中女」呢個身份,喺其他男同事眼中,一有任何接觸已經算係「想食小鮮肉」。自問當晚傾完計之後一切如常,女網民無主動去搵過佢,根本談不上再有任何接觸,但就被冠以呢個罪名;而且老細都知,意味住全公司都應該知。

中年失婚女性,以為自己真係會好似大台嘅劇人面咁,遇上另一段幸福真愛;但事實卻無比殘酷。更可怕係,原來佢哋已被定型,呢種諗法加於佢哋身上更加係令佢哋難以做回自己。都已經2019年,離過婚嘅失婚中女,都仲要被人歧視誤會,會唔會太落後呀?