女人冇安全感好易出事...男人「保命」靠呢5招

愛你愛到殺死你!日本一名網民日前食完由女友煮嘅愛心晚餐後突然暈倒,送院後醒來,本身以為只係自己太攰,點知原來另有內情!

男網民"アル@GRACE両日参戦"早前於Twitter發文表示,食完女友為佢精心炮製嘅晚餐後,突然休克昏迷,女友大驚下將佢送院,網主醒返發現自己喺醫院吊緊鹽水,後來驗血先知,係女友將自己嘅安眠藥、抗憂鬱藥混入食物!

最估唔到係女友咁做,原來只係想利用男友指紋解鎖手機,睇佢LINE同埋Twitter嘅聊天紀錄!網主透露女友過往試過自殘同埋非法禁錮等恐怖行為,雖然明白女友因為冇安全感先咁做,但為日後嘅人身安全著想,都係決定同女友分手。

冇安全感嘅女人,個人冇哂自信,成日疑神疑鬼,嚴重嘅仲會做出危害自己同埋他人嘅行為,男人究竟要做啲咩先叫俾足安全感?即check以下幾點,命仔要緊呀!

1.坦承相處

對於一啲想保持自由及私隱嘅男人,呢點可能好難。但係,坦承的確係令對方有安全感嘅第一步。與其神神秘秘,收埋起自己嘅秘密同擔憂,不如坦白與另一半分享,畀女友走入你內心世界,令女人感受到重視嘅感覺。

2.拖手

好多男人想表現大男人,出街唔會拖住女友手,或喺朋友面前就唔拖。對於女人,十字緊扣等於扣住心,拖手同埋擁抱就等於安全感。

3.主動報到

女友成日check你電話?其實係你忽略對方嘅表現。或者男方有前方,先會一直警惕,冇安全感。唔想女友check住你行蹤,首先要給予對方足夠關心,主動報告行蹤,唔好成日因朋友或公事冇咗影。

4.欣賞對方

人無完美,愛一個人就要愛佢嘅全部,唔嫌棄對方缺點,欣賞對方優點唔單只畀女人好大安全感,調返轉亦會令佢接受你嘅缺點。呢點係雙向嘅,兩者都應該做到,互相欣賞對方嘅好,關係先會長久。

5.愛屋及烏

兩人關係穩定後,自然會談婚論嫁。結婚除咗係兩個人嘅承諾,亦係兩個家庭嘅事。所以與對方屋企人相處融洽,甚至幫佢分擔家庭煩惱,絕對會令女方感受到你嘅心意,夠哂安全感。

圖片來源:Twitter@Fc10Ta、www.pakutaso.com