女仔打機減社交能力 男仔打機卻有幫助?

而家大家電話不離身,而且去到小學生都幾乎一人一電話,不過問到小朋友有電話要嚟做乜,相信十之八九都會話用嚟打機!大家可能都覺得小朋友打下機無咩問題,最多係壞眼要戴眼鏡,但原來研究指,會影響社交能力!

挪威科技大學同美國戴維斯大學一項共同研究,長達6年時間追蹤咗873位6歲嘅挪威小朋友。當中發現6至12歲期間打機時間比較多嘅女孩子,12歲時社交能力明顯比較弱;但相反男孩子社交能力無減弱之餘,較常打機嘅男孩子會比較外向及好動!研究人員指出,男女嘅結果有咁大分別,好大程度在於男女溝通模式嘅不同。女仔於青春期嘅交友關係係比同齡男仔少,但卻更Close,即刻佢哋朋友唔會好多,但每個都好Close,係在於建立心靈上嘅接觸,一旦多打機,就會欠缺咗同其他女仔互動嘅機會,亦減少咗佢哋練習自己溝通技巧能力嘅機會。但反觀男仔,多打機亦代表佢哋係同其他同齡男仔朋友溝通,有好多朋友甚至係因為打機而接觸;青春期嘅男仔交友都係講求有共同興趣一齊玩,所以多打機反而有利交友!