【女生髮型】秒變仙氣女神!香香Jolin示範大熱「珍珠髮夾」

潮流巨輪瞬息萬變,近年時裝界大吹懷舊風,繼「爸爸的鞋」Dad shoe爆紅後,呢期興阿婆最愛的「珍珠髮夾」!歐美日韓台女生紛紛愛上,本地代表亦有岑麗香、陳凱琳做示範,即刻睇下點樣夾、襯咩髮型先最好睇!

女生出門最常紮嘅髮型,唔少得馬尾同埋丸子頭。呢兩種常見髮型,可以用珍珠髮夾增添時尚感。

馬尾

帶點優雅氣質嘅低馬尾,同珍珠簡直係絕配,簡單於耳背後方夾上兩至三個幼身髮夾,感覺即刻唔同哂!

丸子頭

丸子頭青春無敵,原來同珍珠髮夾一樣夾得埋。可以試下戴2個較大嘅珍珠髮夾,固定髮尾之餘又多一個亮點,呢排咁熱,呢個髮型啱哂!

超直髮或微捲曲髮,一樣襯到珍珠髮夾。

長直髮

頭髮側分,於髮量多嗰邊,用3-4個較幼身、唔同款式嘅珍珠髮夾,整齊夾喺耳上方,畀人一種斯文大方嘅感覺。如果你面形本身較細,可以學陳凱琳將頭髮分成中間分界,將單個髮夾分別夾於兩側位置,再襯條背心裙,增強復古氣息。同樣係中分髮型,台灣天后蔡依林兩側夾上數隻大髮夾,襯條絲巾圖案長身裙,冇陳凱琳咁乖乖女,復古得來又有型。

曲髮

曲髮或自然蓬鬆長髮,揀個啪扣式髮夾珍珠髮夾,隨意將頭髮往後梳,隨性得來又有造型。揀呢款髮夾時注意頭上髮夾數量不宜過多,建議一個起兩個止。想瘦臉的話,不妨將一側頭髮撥到耳後,再夾上多個髮夾,可以混搭唔同大小、長度嘅款式,打造優雅感之餘,亦令臉部輪廓更突出,可以學香香咁著埋條小白裙,做咗人媽媽都仲係咁青春少女呀!

再醒多你幾個戴珍珠夾嘅貼士:

最常見嘅戴法係夾一邊側面,配上微捲髮型,帶少少復古味道,新手入門必學。

短髮一樣可以夾,韓妹最鍾意用一粗一幼嘅搭配。

圓臉女生唔好將全部瀏海夾哂上去,記住前面留啲髮絲,修飾面型之外,亦可以提升氣質。

邊個話泳裝look唔戴得珍珠夾?揀幾隻貝殼或海洋元素髮夾mix and match,一啲都唔怪,反而好陽光同埋可愛!

就算日常再普通嘅穿搭,只要加隻髮夾秒變時尚,單夾混搭都得,仲未入手?快啲買啦!

圖片來源:ig@sonya_sedova,louis0387,ncjc_jp,lienhsia,mu__m_,reclover.kr,rimaand___,heungheungeliza,ghlchan,jolin_cai

更多相關文章

岑麗香陳凱琳示範大熱「阿婆髮夾」 手殘女潮物 想瘦臉如何配襯

2019大熱頭飾:特色髮夾·加厚髮箍 玩味優雅風格逐個睇

活用2019大熱阿婆髮夾!10款DIY伴娘髮型長髮短髮都適合