女童大意失3千蚊校車費...港媽撰文感謝路不拾遺地盤工人

有港媽於fb群組「Tai Po 大埔」發文,指女兒返學時大頭蝦唔見咗放有$3000幾蚊嘅車費袋,嚇到「喊住打返屋企」,港媽即刻落街地氈式搜索,連垃圾桶坑渠都唔放過都冇發現,絕望返家之際收到學校來電,原來有好心人拾獲車費袋,仲留低聯絡資料以便物歸原主。

港媽形容「嗰一刻真係喊咗出嚟」,立即聯絡對方交收,之後為表揚及答謝好心人,將經po上網,並於文中加入「三千幾蚊慳慳地夠我一家四口買一個月餸」、「邊個話做地盤係粗人」及「香港好在仲有你」等hashtag。

網民紛紛留言大讚呢位路不拾遺嘅好心地盤佬,「仗義每多屠狗輩」、「論人品地盤佬真係好過西裝友」…亦有網民提醒港媽唔應該畀小朋友保管大額金錢,港媽回覆表示指日後都會親自將車費袋交到校車姨姨手。

此外,亦有網民分享自己遇過嘅好人好事,希望傳播更多正能量。講真,其實路不拾遺,細細個老師都有教,將心比己,自己唔見嘢都想有好心人還返畀你,如果你曾經起貪念拾遺不報,唔該你反省下,我深信呢個世界有因果報應呢。

圖片來源:激戰截圖