婆媳大戰 為老婆登報同阿媽脫離關係?

「老婆同阿媽一齊跌落水,你會救邊個先?」呢個世界級難題,相信冇男人會想畀人問起,不過最近一名梅性港男就好明確表示揀老婆唔要阿媽,仲登報脫離母子關係,好激!

有網民喺facebook群組「North District北區」上載一張報紙分類廣告截圖,內容大意為男人因婆媳糾紛,決定同阿媽脫離母子關係,表示「我很喜歡我老婆,所以放棄阿媽。」仲清楚列出佢個名同埋身份證部分號碼,即時引起大批網民留言討論。

大部分人怒插登報男不孝,唔念及阿媽養育之恩,真係「生舊叉燒好過生你!」但亦有人企喺老婆角度出發:「唔係個個阿媽都一定係好人嚟」、「或者人哋阿媽唔當個新抱係人,你點知?」亦有人陰謀論,懷疑「不肖子」真正目的係想分戶,或者方便申請綜援、公屋。

婆媳關係自古以來係一對夫妻嘅重大考驗,不如一齊分析下問題所在。

1.住屋

好多年輕夫婦冇錢買樓,被迫同老爺奶奶一齊住,又或者因為單親長大,老公唔想同阿媽分開住,結果可能三百零尺迫住幾個人,大家冇生活空間,磨擦自然多。如果老公擔心阿媽孤零零而唔想分開住,可以提議住近屋企;如果係冇錢買樓或租樓貴,不如倒轉叫老公返娘家住,一來等老公感受一下做「外人」嘅感受,二來一般男人同外母相處冇女人同奶奶問題咁大。

2.性格

每個人性格都唔同,唔一定係奶奶麻煩,同樣有麻煩惡搞嘅新抱,夾唔夾得埋,真係好睇你遇著個咩性格嘅人,萬一真係遇著個野蠻奶奶真係幾頭痕,作為後輩唯有退一步海闊天空,嘗試當奶奶係自己媽咪,當佢講嘢係耳邊風,應咗就算,當然態度要扮誠懇,最多之後同朋友傾計發洩。

3.老公

另一半嘅態度好重要,唔係要佢偏幫某一方,最好公正啲睇清事實真相,用理性同佢哋分析。有時奶奶難頂,新抱唔應該出面同奶奶嘈,身為男人應該要出面講句公道說話,阿媽通常都聽仔講,問題自然會減少。如果男人一味逃避,只會令問題惡化。

4.立場

奶奶覺得新抱搶走咗個仔,新抱怨奶奶霸住個仔,兩方面都希望男人聽晒自己話。立場對立,自然起衝突。解決方法係令奶奶覺得你唔係搶走佢個仔,而係多咗個女,雖然好難做到,但如果做得到,老公自然會更鍚老婆!

5.代溝

大家唔同年代長大,同奶奶難免有代溝,呢方面真係要靠互相遷就,先欣賞老人家有好多人生閱歷,另一方面試下叫老人家接受下新思維,係要畀啲耐性架喇。

圖片來源:《BB來了》劇照截圖