《學識奸狡很容易,保持善良先最難》

每個人都會經歷讀完書離開溫室,走入職場呢個現實世界嘅時期。而當中社會教你嘅嘢好多,同時呢個社會其實喺不知不覺慢慢蠶食緊大家嘅夢想,大家嘅初心,慢慢地將大家變成差不多老練嘅大人。

辦公室根本就係另一個政府,同樣勾心鬥角,同樣要搞政治玩政治,只係有啲公司比較出面,有啲比較虛偽扮和平友愛啫。出到社會我哋好快就明白一件事,上到位唔代表你叻,你叻唔代表你人工高職位高。於是為咗生存好多人都會學識上位之道,就係靠關係靠奉承乜乜乜⋯⋯

好簡單,當你生存喺一個大逃殺嘅社會,總之升職得一個,你要踩住人哋嘅屍體去上位無人會怪你,但係要你能夠保持到善良,只係專心做好自己事就好難,因為喺職場上你對人仁慈即係對自己殘忍,你唔忍心踩住人屍體,你就好快會變成被踩住嘅屍體。

其實每個職場老屎忽都曾經係抱住赤子之心嘅職場新鮮人,只不過被社會同化,慢慢變成又廢又賤又奸嘅老臣子啫。我唔知職場上有無道德可言,有無人會頒張好人卡畀啲循規蹈矩嘅員工,我淨係知現實社會做「三好」係唔會發達,喺香港老老實實嘅人就只會繼續攬住貞節牌坊去做個普通人,因為有錢嘅人,通常都係比較奸,比較有侵略性,如果唔係好地地打份工,你諗到你會買到樓?你會發達?你會升職上位搵大錢?

港女友