專家呼籲納「性上癮」成為精神病一種 係拯救定係標籤?

世界有各種各樣嘅嘢令人上癮,有人食煙、有人飲奶茶、有人吸毒、有人打機等等等,其中唔少都有相對嘅解決方式,甚至係一群專業機構去幫助上癮人士去戒除。不過近十年八年,似乎又多咗一種行為開始為人關注,就係「性上癮」。知名患者包括哥爾夫選手老虎活士、英國知名喜劇演員Russell Brand等。

對唔少人而言,性係美好嘅事情(相信對大部分人都係),但有部分人士更樂此不疲,每日思緒都圍繞呢個主題,甚或出現病態性嘅性上癮情況。現今世代性上癮有嚴重趨勢,最主要原因係太容易接觸色情物件,輕輕幾個動作,手機等裝置已經搵到無盡色情資訊。有匿名人士話自己,從青少年時期開始,一有機會就自瀆,過後去打機、出街,一旦回復精力又再去自瀆,一直到長大後對性更加係沉迷,對任何女性第一念頭都係性,一有機會就想發生性行為,嚴重影響日常生活。

美國UCLA大學「神經科學與人類行為」學系教授Nicole Prause就研究過200幾位參加咗性上癮治療機構嘅人士,發現當中有8成人都被診斷出有其他各種各樣嘅精神病,大部係抑鬱症、焦慮症等。雖然唔可以話有性上癮嘅人士一定有精神病,不過如果你有性上癮問題,8成機會你擁有其他類型嘅精神病,比例相當高!Nicole一直以嚟都希望國際社會醫學界,可以直接將性上癮納入為精神病嘅一種,希望由精神科醫生以專業手法,例如藥物、手術去治療性上癮,而並非單靠其他團體單單以輔導方式去解決。

唔少人質疑一旦性上癮列入成為精神病,會唔會令更多人拒絕承認自己係性上癮患者,怕被標籤成「精神病人」?Nicole就持相反意見,覺得反而當性上癮成為精神病一種,社會先會更加接納性上癮患者,因為大家都會明白性上癮患者唔係坊間所指嘅「咸濕」、「猥瑣」,佢哋只係腦部出現異常、需要醫生幫助嘅病人,同其他患有精神病嘅患者一樣,需要嘅係大家嘅關懷同接納,而非批評及排斥。於工作上,亦可以保障佢哋不被僱主無理解僱或職場歧視。大家又點睇性上癮患者呢?

參考資料:UCLA