【少女Tech】日本人都在用甚麼電話?Sharp仍然有市場?

日本一向係科技領先嘅國家,所用嘅電子產品一向係大家追捧嘅對象。尤記得iPhone未雄霸全球之時,日本人用嘅電話例如Sharp、Sony Ericsson等帶起陣陣潮流。日本女生用摺機、推機嘅年代,總愛將電話繩綁於電話旁,相信當年喺香港都見唔少人有樣學樣。

時移世易,iPhone嘅興起,連一向支持自家產品嘅日本人,忍咗幾年唔掂iPhone之後都係忍唔住,最後都被iPhone所攻陷,摺機推機頓變成歷史。不過唔知係咪風向又轉,今年日本嘅電話,又靜靜起革命!根據IDC國際數據公司嘅上季日本國內出機量,一共有707萬部新手機賣出。其他iPhone係最多,佔咗37.1%;而大家認為iPhone競敵嘅Samsung,竟然只係排第三佔15.5%;第二位就係Sharp,有21.3%!至於一向日本有超強地位嘅Sony,竟然頭五位不入,跌幅超級大! 另一間華為就因為被禁,同樣跌出頭5位。

大家可能唔明點解Sharp會上咗第二,其實佢近年推出嘅AQUOS系列,行返日本人最叻嘅簡約設計,加上種種可以Connect到日本其他AI產品嘅程式,都吸引到唔少人由iPhone轉投Sharp懷抱。仲有呀,Sharp已經向媒體展示咗自家研發嘅OLED無痕摺機,相信可以搶飲頭啖湯,更加令人期待!

講起摺機,當年Sharp推出多款摺機,都可以話一代經典,唔少香港人都擁有過至少一部,例如當年全球首部機機達100萬像素嘅GX32 ,2004年推出,當年嘅相片質素嚟講真係頂級,而且機身銀色帶金屬感,售價成$4,680 !當年風靡日本、香港,以及全歐洲,風頭一時無兩!