【少女Tech】為2憶單身用戶謀福利 FB正式推出交友功能!

自早前FB宣佈將會推出Facebook Dating,大家都拭目以待,因為FB掌管住過十億用戶資料,佢哋搞嘅交友平台可想而知有幾多「彈藥」可以用。據FB自己粗略估計,有2億用戶都係單身,如果都成為FB Dating嘅用戶,呢個絕對係全宇宙最大型嘅交友平台。而呢個平台已經係美國及另外19個國家率先推出!(未有香港份)FB Dating究竟點玩,一文教晒!

完全同個人FB分開

大家可能一開始就會先問呢個問題「咁咪全部FB朋友都知我想交友?」放心,FB好貼心地處理好,FB Dating可以話同自己個人帳戶完全分開,大家可以Set Up一個Dating嘅帳戶資料,並且可以選擇畀唔畀自己FB朋友知,甚至可以選擇交友時將全部自己嘅FB朋友、甚至Mutual Friend都排出Pool外,務求唔畀你認識嘅人知道你有用FB Dating。

開設帳戶好簡單,不外乎放相同個人資料。每人可以將自己Profile分成12格,每一格可以放相(最多放5張相,可直接放你FB或IG嘅相片),另外組成部分可以係你嘅「答案」;Dating會提供一系列問題畀你選擇去答,例如「如果你可以揀工作,你想做咩?」「揀三個你最想見嘅人。」「你最感恩嘅事係咩?」。呢12格就係其他外人認識你嘅初步印象喇。

點去識人?互相暗戀即時配對!

至於實際上點運作呢?主要可以用兩個方法,第一就係由FB幫你,搵同你相類近嘅人,以年齡、工作、答案等幫你搵「建議」嘅約會對象。另一個途徑係好似平時玩FB咁,有好多唔同Profile出現,你可以Like,FB會自動幫你將Like過嘅帳戶挑選出嚟畀你再揀。正式接觸方面,大家可以好似平時FB Messenager咁同人溝通;不過最大分別係只能夠用文字,唔可以傳相片或其他附件。

另一個比較好玩嘅功能就叫「Secret Crush」,即係暗戀。你可以將最多9個你FB或IG朋友放入呢個「暗戀表」,對方係會收到一個FB訊息表示「有人暗戀你」,但並唔會講係邊個。但一旦你List入面有任何一個人,亦有放你落佢個List到,代表相方都有好感,咁FB就會連繫你哋兩個,係咪好好玩先?不過每日只可以加一次,免得你一日係咁加去試下有無人暗戀你呀!

目前FB Dating係全免費,預計2020年開始會推出至歐洲地區,但香港就未有消息,可能受制於地方太細未必咁容易玩,大家可能要再等下喇!