【少女Tech】Facebook Dating推出一周 用戶意見係?

早前介紹過Facebook千呼萬喚終於推出約會功能Facebook Dating,簡介用法可以睇返舊文:【少女Tech】為2億單身用戶謀福利 FB正式推出交友功能!。就咁睇活好似功能性十足,而且好保障個人私穩。功能推出一星期之後,大家又有咩睇法?原來喺外國,呢個功能唔單止唔係太受歡迎,甚至引嚟唔少批評,而且主要唔係針對功能上有咩問題,而係產品嘅性質及對Facebook嘅唔信任。以下總結咗外國網民嘅不滿,大家覺得有無道理?

不信任FB對個人資料使用

雖然Dating功能入面個人資料可以完全同FB本身分開,但其實大家Dating嘅資料最後咪又係落入FB手中。大家都知FB經常都會分享用戶資料予各大公司或其他APP,FB加加埋埋就畀咗5億美金罰款。難保閣下嘅Dating資料第時會出現喺其他約會網站,或者被其他公司用作推廣。

超多假用戶

講起FB假用戶,大家都唔會陌生。過往假帳戶係用於畀Like,新嘅Dating功能如果出現大量假帳戶,對Dating用戶嚟講可以話係一大安全隱憂。有資料就顯示,Dating功能開始之後,有85%來訊都係「釣魚」訊息或來自假用戶。假用戶唔單止有機會盗取個人資料,亦有可能係電騙嘅開始,令用戶失金又失身。

Dating帳戶一世跟身

有用過Dating App嘅朋友都知,好多時開帳戶都係用電郵,好處係一旦唔想再用呢個帳戶,大可以刪除戶口再開一個,俗稱「跳坑」;但FB Dating某程度係一個FB只有一個Dating帳戶,一旦開始你就一直要用呢個Dating帳戶;除非你連自己FB都唔要,重新開一個。如此一來,要重新開一個新Dating戶口,代價係極大。

雖然目前未知Dating功能幾時殺到香港,不過都預計會係2020年嘅事。大家睇完以上3點,有無心理準備開始用?定還是會再觀察一排呢?