《年紀越大,越難鍾意一個人》 — B612

而家終於明,點解啲港女成日被人垢病話佢地奄尖聲悶、吊高嚟賣。以前鍾意一個人,條formula係咁:只要佢有一樣嘢吸引到你,其餘缺點一概不理。而家要鍾意一個人,個玩法係……唔理佢有幾多優點都好,只要有一樣嘢唔合格、睇佢唔順眼,就要彈鐘game over。

喂其實唔係啲港女有問題呀,係一個人身經百戰之後……真係唔會再想行返入個戰場到做箭靶架。

明明唔係七老八十,做咩咁快就話唔想拍拖先?一句到尾,就係驚。你對住自己個肚腩都會講不如聽日先減啦,道理都一樣,咁揀擇都係想推遲拍拖,推遲來回地獄又折返人間嘅日子。

話晒曾經死心塌地……點知被人一盤冷水照頭淋,良心當狗肺,所有愛同心機都付諸流水,咩火都淋熄啦。就好似你嘔心瀝血洋洋灑灑數千字,跟住個中文科miss同你講:喂離題重作 —— 我頂你咩……邊個仲咁有心機由頭諗過、由頭寫過呀?挑剔啲,揀個條件好啲嘅對象,起碼唔洗重蹈覆轍,減低出錯機會嘛(好似係)。你估自己仲有好多青春可以嘥、仲有好多眼淚可以流?


而家好多人揀用交友app,就係因為用呢樣嘢識人近乎係零成本。你可以慳返再經歷周圍物色合適嘅伴侶、重新互相認識磨合嘅漫長階段,直接進入另一場短或長跑。

見過鬼都怕黑啦。唔係我哋諗縮數,想用最低成本換最大回報,而係……大家都受夠傷喇,唔想再冒夭折嘅風險。年紀大,係越嚟越難服侍!

***********************************
網絡作家b612 – facebook專頁:b612lpp

(鍾意睇嘅請你去俾個like,支持吓我繼續寫嘢吖!:))

「倘若有一個人對一朵花情有獨鍾,而那朵花在浩瀚的星河中,僅此一朵。那麼,他只要仰望繁星點點,就心滿意足了。於是他喃喃自語:『我的花就在星河的某個角落』可是,這花一旦被羊吃掉了,瞬間,所有星星也將隨之黯淡無光。那你也認為這不重要嗎?」