《幸福唔係一分耕耘,一分收穫》 — B612

踏入呢個年紀,身邊好多對情侶都差唔多修成正果。亦因為看似死線將近,唔少人反而會喺終點前突然醒覺,其實同床共枕咗好多年嘅,並唔係自己想要共度餘生嘅枕邊人。十年時光,不過南柯一夢 —— 得個吉。


有種人明明樣貌、條件、性格都不過不失,有份正職養得起自己,有能力儲錢買樓,唔奄尖揀擇、無臭脾氣,對另一半算得上週到細心……但偏偏呢,咁多年嚟遇到嘅另一半,唔係見異思遷就係無疾而終。

好似楊千嬅首《可人兒》:「這數年不理深愛著誰/亦未被對方珍惜過/沒有花沒有果……抬頭望鏡亦算不失不過/到底我甚麼出錯」。

「大把人差過我啦,咪又係一擊即中結婚生仔行到尾。我到底做錯咗啲乜嘢?」朋友咁嚟問我,我聽到都好心痛。但事實係……係架,愛情係唔公平架喇。幸福唔係耕田,唔係話你施咗幾多肥,就一定會有幾多收成。唔同植物需要嘅養份都唔同啦,咁啱人哋兩個臭味相投,各取所需,自然而然就可以直到終點。一味付出對方唔需要嘅嘢,係唔會有開花結果嘅一日……你要接受,有啲嘢唔係努力就會得到。

有時心理質素都好重要。成日怨天尤人,諗住點解人有你無,好容易就會望天打卦,原地踏步。幸福唔可以強求,但肯定都唔可以以逸待勞。


要得到幸福,無話特定邊條方程式。今日未遇到,唔代表將來都無。都係放鬆心情,隨遇而安,做好自己先啦。


***********************************
網絡作家b612 – facebook專頁:b612lpp

(鍾意睇嘅請你去俾個like,支持吓我繼續寫嘢吖!:))

「倘若有一個人對一朵花情有獨鍾,而那朵花在浩瀚的星河中,僅此一朵。那麼,他只要仰望繁星點點,就心滿意足了。於是他喃喃自語:『我的花就在星河的某個角落』可是,這花一旦被羊吃掉了,瞬間,所有星星也將隨之黯淡無光。那你也認為這不重要嗎?」