【情人節2019】情人節送花有學問 送幾支咩顏色都有規矩?

每年一到情人節,定必係每位男士全年最緊張嘅日子,唔係單單安排當日嘅活動同晚餐,亦唔止係準備禮物,仲有最重要嘅送花!當然收花係大部分女仔口不對心嘅想法,通常都係口裡說不,但心裡卻好希望你自動自覺,最好時間當然就係Office Hour喺公司收到,威完一次收工再拎出街威一次。就係因為一束鮮花咁重要,作為男士千萬咪兒戲,忽然呢個情人節最重要嘅一環,就算捨得使錢,都要知自己送得啱唔啱架嘛!

情侶咪送紫色、藍色

香港女士通常鍾意粉紅色嘅花,同外國相反,因為外國嘅情人節9成女士都係收鮮紅色花,只係香港女士唔太鍾意;所以紅色同粉紅色都無問題。但千萬咪送錯紫色或粉藍色,呢兩種係示愛嘅顏色,除非你仲未表白,尚在暗戀對方當中啦。

99支玫瑰咪亂送

唔知係咪睇得戲多,近年多咗男士一擲千金,豪送99支玫瑰,以為實威盡全場,但其實反而令到女士仲尷尬!事關99支玫瑰係代表求婚,情人節其實普通一束鮮花就得(已女士能單手拎到為佳),或者就咁一支紅玫塊,包裝得靚靚仔仔就已經好足夠,唔係愈多花就代表愈好嘅!

乾花又得唔得?

近年唔少女士喜歡乾花,因為夠特別之餘又唔會好似鮮花咁幾日就枯,夠晒環保;呢兩年仲因為韓劇,唔少人會訂棉花,幾支棉花搭埋幾束乾花一齊,望上去完全唔畀鮮花失禮,而且價錢仲平一大截,最啱啲唔鍾意太高調嘅女士,文青得嚟又有心思,男士加晒分!

玫瑰之外嘅選擇

好多女士覺得玫瑰老土又唔特別,其實玫瑰以外都有唔少花可以選擇,例如鬱金香,粉紅或者紅色嘅鬱金香都係代表愛意嘅花;另外馬蹄蘭、滿天星都係情人節嘅熱門花種之一。年年送玫瑰,今年轉下其他花種等佢驚喜開心一下,又可以突顯自己心思。

相關文章:

情人節送花最緊要突出!這4份花藝品比花束更有驚喜!

情人節快到 讓居室充滿浪漫氛圍

【花藝創業】情人節生意多5倍 前藝人曾建怡:拍劇養唔掂自己…

Tag:情人節、2019、送花、玫瑰、棉花