情侶同居 發現男友仍收藏舊愛衣物 女友嬲爆

好多伴侶都唔介意婚前同居,大家都開始接納呢件事係普通不過;不過外人雖然釋懷,唔受傳統所限,反而自己需要調整心情,因為同居其實需要一個大心臟。除止生活上要完全接受另一個人嘅習慣之外,仲要准備見到一啲唔想發現嘅事情。一位男網友就喺高X討論區到出Post,今年30歲,話同女朋友拍拖1年,大家都覺得彼此好夾,更去到談婚論嫁,諗住先住埋一齊。點知女友入住後,無意發現自己前女友喺屋企留低嘅一櫃衣物,大概有10件衫、裙;另外仲有底衫褲。女友即時大怒,大興問罪之師。男網友話前女友已經分手兩年,只不過當時分手後,男網友唔想觸景傷情,直情成個櫃都唔敢再開,估唔到反而引發呢次核彈!

事後男網友又氹、又解釋,但女友仍然大怒,即時將成櫃衫倒出外面垃圾房。男網友話事後成個月,女友仍未完全息怒,仲不時提及,又將自己同前女友比較;又問佢萬一他日分手,自己係咪都淪為一櫃遺棄衣物。唔少網民都話女友行為野蠻、無理,不過亦有好多人話女人有妒忌心實屬非常正常,一向留低前度物件,對於女人嚟講都係死罪;何況仲係一櫃衫包括底衫褲,醋意一發不可收拾。男女意思大不同,對於男人嚟講,呢堆衫根本就已經無任何意義,所以根本連倒都費事,完全無任何情感投射。

如果代入環境,你係嗰位女友,你覺得男友緊張前度物件,定好似呢位男網民咁完全唔關心唔記得呢?