愛情不進則退?兩性關係治癒師:3招保持激情

張學友首本名曲《每天愛你多一些》,成為上一代金曲,全因當中嘅歌詞係何等浪漫詩意。可惜,實際上莫講話每天愛伴侶多一些,如何留意當刻嘅激情及愛意已經係一大學問。有人話愛情最終會變細水長流,激情一旦消退,就難以保持過往嘅甜蜜,而且不限年齡,哪怕人到中年,都會出現突現對伴侶失去愛嘅感覺。美國洛杉磯著名兩性關係治療師Nazanin Moali,就話一旦覺得自己好似對伴侶嘅愛意減退,一定要首先問自己以下三條問題:

1) 是否突然之間還是漸漸減退?

2) 你意識到減退之前,發生過什麼大事?

3) 你有沒有試過去解決問題,最後結果如何?

Nazanin Moali多年經驗,多數發現感情變淡嘅原因,都唔係因為伴侶有特殊嘅轉變,改變嘅一定係自己嘅心:「最常見嘅原因,係你付出已經唔係好似以前咁多。」例如以前嘅你對伴侶有耐心,肯花心機;一旦你放鬆咗,可能會導致伴侶種種缺點都外露;其實呢啲缺點對方一直都有,不過你以前肯用你嘅耐性去應付,但一旦你放任之時,就係問題爆發時間。當然有時有好多外在環境因素影響,都係令你自己改變嘅原因,例如親人離世、健康問題、工作困擾等。

Nazanin強調,感情淡咗係好平常,千萬唔好直接放棄,以下幾個建議方法都可以拯救剛踏入衰退期嘅感情關係:

1) 一同嘗試新事物

伴侶二人有共同興趣,係維繫關係不二法門,如果發現感情轉淡,不妨一齊搵下新興趣,大家再「Reconnect」;而且一共進行新活動,或者可以發現對方未被發現嘅優點,令你再愛上對方。

2) 珍惜二人相處時間

老生常談,建立良好關係就需要有二人時間,無論幾忙都好必需安排時間,唔需要好複雜,簡單一晚約會都可以。「最常見係二人變得老夫老妻,太安逸太平靜。」盡量安排一星期有一晚活動。

3) 找專業人士協助

婚前輔導就好常見,但其實兩公婆、男女朋友一樣可以尋找專業人士協助,例如兩性關係輔導員,透過輔導員技巧去令雙方互相了解,體諒對方。其實好多時有啲小問題,雙方唔方便傾,積落就變得好嚴重,所以輔導必須適時睇,愈早睇愈好。

參考資料:Nazanin Moali