【感情台】兄弟情 敵不過香港土地問題

香港地要買樓究竟有幾難?一個正常家庭無父幹之下買樓似乎係痴心妄想;好多人本身都會因為呢種情況,連拖都唔敢拍,但偏偏又有人相反,仲要結婚生仔住埋同一間公屋。最近網上有人開post,話自己同家人住緊公屋,仲有一個阿哥,家姐就已嫁人搬出,屋企得阿媽有工返,老豆退休,樓主讀書。但阿哥女朋友大肚,仲要係龍鳯胎,於是諗住一齊住,即係話屋企會多出3個人。全屋人為咗呢件事,仲用咗全家積蓄10萬僅餘嘅6萬出嚟翻新屋企。

不過正當樓主以為阿哥會感激家人咁愛護佢一家時,阿哥就直接同樓主講「不如你搬出去住啦。」樓主只係一位學生哥,試問又如何有能力自住;相反阿哥都30歲,仲要自己搞大人哋個肚,屋企已經好好咁幫佢安頓,到頭來反而人心不足。好多人都話無條件唔好生仔,其實居住環境絕對係生仔要考慮嘅因素之一。正當全香港唔知幾多嘅中產都因為唔夠地方而唔生,偏偏好似樓主阿哥嘅就大有人在。

最後網民仲由鬧佢阿哥變鬧樓主,話佢太心軟,乜都以阿哥阿嫂著想,擔心佢哋BB唔舒服等等,反而無為自己發過聲、爭取過,真係吃力不討好,最慘似乎都係佢喇。