《感激那個相信你夢想的女生》

老實說,大部分男仔喺二十幾歲都係「咩都無」嘅階段。無錢無事業無樓無社會地位,而有啲男仔擁有多啲,嗰樣叫夢想。香港人面對住高不可攀嘅樓價,生活嘅壓力,好多人已經放棄夢想,投入金錢嘅懷抱。而嗰啲抱住夢想嘅人往往都係收入較少,走嘅路都較難行,所以要搵到一個肯相信你發緊嘅夢嘅女仔,其實好難。

我身邊有朋友夢想做電台,讀大學時一直努力,去咗電台工作。另一半大學時期認識,女仔開頭覺得呢個男仔擁有夢想好有型,亦好欣賞佢會去追逐夢想。幾年後,男仔喺電台依然係最底層,搵緊一萬蚊。女仔做咗公務員,月入兩萬。故事後來發展就係女仔開始覺得男仔靠夢想搵唔到食,開始覺得佢嘅夢想不設實際,開始覺得同呢個男仔無咩未來⋯⋯結果?咪選擇分手。

我諗嗰個女仔早已忘記當日自己係被男仔追夢嘅光環吸引,但後來又因為男仔追夢而意興闌珊。然後你可能會衝出來鬧個女人貪錢,但其實世界本來都係現實,無麵包食嘅愛情從來都係困難重重,只能話呢個唔係一個願意同你捱嘅女人,佢想要嘅係穩定嘅麵包。

就係因為現實好現實,所以先更加顯得嗰啲同你捱窮都肯相信你夢想嘅另一半珍貴!一個願意支持你去發夢,同你一齊相信你夢想嘅另一半,係比起夢想本身更珍貴!不過男生記住最好嘅感謝唔只係繼續努力,而係要記住他日成功了都唔好忘記曾經無條件支持你嘅嗰個人。