戀愛系:地下鐵碰著他 搭唔搭訕好呢?

每日返工,坐地鐵都係惡夢,逼到沙甸魚一樣,真係喊出嚟!不過,喺呢個咁惡劣嘅空間之中,竟然仲有唔少人搵到自己嘅春天。無錯,原來當年「地下鐵碰著他,好比心中女神進入夢」仲未過時,事關好多人仲喺地鐵遇見自己嘅男女神,然後譜出一段良緣。事關早前喺討論區有人出Post話有無試過喺地鐵搭訕,原來唔少人有相類似經歷,就係遇見心儀對象,而對方明顯亦留意到自己,大家都好似互相等對方出聲;留意,唔係一定係男士,原來好多女士都係想主動出擊㗎。不過,10個有9個最後都係開不了口。無他嘅,好多人怕開口畀人拒絕,或者畀人當成唔正經嘅人。嗱!總括大家嘅意見,只要合乎以下幾點,就算開口搭訕,都唔怕被人誤會係唔正經嘅人呀。

經常見到

如果一見第一次就搭訕,當然畀人感覺係你「貪圖美色」啦;所以如果係經常見到嘅,大家彼此都互相知道對方存在,無疑係增加唔少信任度。

借力打力

唔想成件事咁突丌,千萬唔好咁直接走埋去話想識人咁呀,大可搵理由同人開口,例如問下路,之後先開始同人傾兩句,唔好畀人當變態佬呀。

樣貌娟好

好直接,好現實,唔係話一定要靚仔靚女到非常,但都千萬唔好太毒太猥瑣,所謂毒X最忌有自信,再坦白啲講句,真係唔好越級挑戰,唔好FF太多。