戀愛系:想識新朋友 請在30歲之前?

啱啱踏足2018年,唔知大家今年又許咗咩願望?不過要小編估,一定係唔會有呢個答案「交新朋友」!因為唔知大家有無發現,一個人去到一個年紀,就會開始結識唔到朋友,留意係真正嘅朋友,可以講真心話嘅知己良朋。明明人愈大,應該愈知性,應該愈見多識廣,可以同人更多話題,但偏偏要真心交朋友咩,又好似總係力不從心。久而久之,好似已經放棄識到新朋友嘅希望。通常呢個年紀,不外乎30歲左右,人生轉咗第二、三次工之時,其原因究竟係?

人愈大愈虛假

大家唔好否認,呢個係非常直接嘅原因。一個人大咗,自然曉得戴上假面具去做人,而交朋友呢件事,一定要打開心扉,坦誠相對,咁戴住面具又點可能做到呢?

曾經蝕底

做得耐人,都一定中過唔少招。即係話曾經試過當人係真朋友,結果被人背後捅一刀,或者人哋只係利用你去達成某種目標等等,久而久之,變成唔再相信新結識嘅人喇。

隔膜愈大

莫講話新朋友,今時今日連舊朋友都好少機會見面接觸,隨住科技發達,人類更加多隔膜,加上娛樂愈嚟愈多,老婆仔女等束縛亦隨年歲增多,更難得去主動建立一段友誼啦。