戀愛系:搵個識煮飯嘅女人 同搵恐龍差唔多

不如咁講,現世代嘅女人唔係因為唔肯煮,同時係因為無時間煮!香港愈嚟愈多「無飯夫妻」,好多時因為大家放工,返得屋企(尤其住得偏遠地區嘅朋友)好多時已經8、9點,仲要煮飯真係有啲強人所難。不過撇除呢個元素,如果單講廚藝,請問有幾多女人可以自豪咁跳出嚟自認「自己識煮飯」?時移世易,唔少女士從細到大都無接觸過煮飯,亦唔覺得係必要技能,有時學多幾樣課外活動仲好。今時今日如果你搵到一個煮飯叻嘅女仔,真係要即刻Mark實,娶得過!

有一個識煮飯嘅老婆,有咩好?除咗唔使煩每晚要出去食之外,仲食少好多黑心食物,又少糖少油,自然全家都健康啲!不過當今女權當道,要小心講嘢,好多人都會話「入得廚房出得廳堂」係對女性嘅貶義,嗱,要澄清返其實我哋男性一啲咁嘅意思都無!點解?因為大部分男人從一開始認識新嘅女性朋友,已經率先覺得佢哋唔會識煮飯(要咁好彩搵到個識煮飯嘅女人喎,等同搵恐龍一樣咁難);所以你唔識,根本唔會令男士們失望或者難受,但如果你竟然識,可以話係加50分咁解!