戀愛系:為何「麻利型」女生 會係男人最不喜歡的類型?

講到靈氣(Aura),可能太抽象,好多人都未必明白;咁套用一個貼地嘅詞,就係幾年前被人玩到謝嘅「仙氣」,大家係咪即刻明晒呢?宜家好多女人都鍾意文青路線,講求嘅除咗係外型要有文青Feel,最重要係生活方法都要講究。呢種女生都有一個共同特點就係自我感覺非常良好,好鍾意自己呢種生活方式。但觀乎近年呢種靈氣女生,原來男女觀感落差極大,其實喺大部分男人眼中係極不喜歡呢種女生。如果唔信?睇下網民對903 DJ麻利就知,自己Search,呢度唔詳述。對於呢種靈氣女生,男人們都係避之則吉,想知自己會唔會不自覺咁做咗?睇下以下特點有三:

信命理/星座/塔羅

經常神婆上身,更多時會提及咩靈氣、命相等術語,似是而非嘅神秘星相學說等,甚至鬼神之說。總之好似覺得自己有股與別不同嘅能力,可以感受到宇宙畀自己嘅能量,係咪好玄呢?

永遠正能量

呢種女生好大特點係長期保持正能量同Hyper狀態,少少事都會好興奮,同埋永遠覺得其他人唔開心係「唔識諗」、「唔積極」;無諗過自己過份正面其實都係乞人憎。

其他人生活方式就係錯

唔知哪裡來的自信,呢種女生好鍾意批判其他人嘅生活方式,例如自己食素就會嫌人哋食肉好殘忍、自己早睡早起就會話人哋夜瞓自然身體差等等;總之全世界得佢哋最健康最有靈性。