戀愛系:英國王位繼承人多達1,300人 連廚師及升斗市民都係

英國皇室本年度一大喜事,就係5月19日英國哈里王子將會迎娶梅根。馬克爾!哈里王子大婚,其實最開心都係皇室一眾長輩,畢竟哈里可以話係一眾王子之中生性最風流嘅一位,今次終於定落做人老公喇!哈里喺英國皇室繼承人,目前排名第六位,第一位係老豆查理斯、第二係威廉王子、第三係威廉王子個大仔喬治、第四就係威廉次女夏洛特小公主、第五係新出世嘅威廉細仔路易斯;之後就到哈里!

講起皇位繼承人,原來呢一眾繼承者們,竟然多達1,300位,除咗英國皇室嘅王親國戚之外,原來仲有好多四散於民間嘅平民百姓,甚至好多都係一直唔知自己係其中一位繼承人。畢竟排名呢樣嘢,其實唔係排首幾位,真係無乜機會做得國王,真係連夢都唔使點發,努力過返自己生活好過。舉幾個例子,其中一位竟係美國出世,目前喺波特蘭做廚師嘅韋斯利,佢自16歲起開始學廚,一做就係20年;而佢原來係王位排名310位!韋斯利係當年英國哥達王朝卡洛林公主嘅後代,曾經統治過比利時、葡萄牙及英國,為一大國嘅君主,後來敗亡先淪為平民。

另外一位繼承人仲好笑,竟然係挪威國王本人!挪威國王哈拉爾五世係排名60位繼承人,因佢媽媽係英國前女王維多利亞女王嘅孫女,後來因王族通婚嫁畀挪威王子;類似因為王族通婚而有排名嘅,仲有瑞典國王,排182位、丹麥女王排208位、荷蘭女王排806位。