《我哋身邊總係有個唐詩詠》

最近因為唐詩詠同洪永城嘅新聞,令我睇番呢個被封為「絕世好女朋友」過去嘅情史,睇到佢過去因為原諒過花心崔建邦七十個七次,對方偷食打完中巴之後都不離不棄⋯⋯我終於明白點解網民會封佢做100分女朋友。

唐詩詠情路係坎坷,但絕對無必要可憐。我唔係要落井下石,只係覺得如果一個女人無帶眼識人,搭上賤男,第一次係值得被同情。但當呢個女人見識到對方嘅花心,對方嘅背叛之後,仲繼續默默忍受,呢啲就唔係叫不離不棄,呢啲叫縱容叫懦弱。

先撇開唐詩詠一個人嘅故事,其實現實生活我哋身邊都有好多個唐詩詠。一個可以原諒男朋友多次偷食嘅女朋友,一個可以容忍男朋友郁手嘅女人。我分享我身邊一個真人真事,有個認識嘅妹妹,同男朋友拍拖都四五年,據我所知嘅都聽過男仔偷食過兩三次,但因為係一夜情,女仔就覺得無感情嘅,於是都一一原諒。到前排女仔話佢同對方鬧交時對方郁手打咗佢兩巴,佢好嬲話分手,但最後⋯⋯又一齊番嚕。

我諗你睇到呢個故事,你同我一樣,唔係會讚個女仔絕世好女友,而係會鬧點解個女仔咁蠢!Exactly!呢個世界唔係所有人都值得你不離不棄,對方有難有病有事你繼續留喺對方身邊,呢啲係叫不離不棄。但如果對方背叛你傷害你,根本唔應該愛嘅時候,你唔離開唔係有情有義,只係太愚蠢。

女人不幸遇到賤男唔緊要,但人哋唔愛你,你都要好好愛自己。人哋傷害你一次係人哋嘅錯,但如果你縱容對方繼續傷害你,你唔去保護自己唔去反擊,咁最對唔住你嘅,就係你自己。 

港女友