扒手術語 咩叫「V老篤」?

最後新聞頻頻報道香港再次出現扒手黨,例如其中一位60多歲受害男士就坐坐下巴士無端端被人用刀劏開後面尾袋,再用鉗將銀包入面7張5百蚊紙拎走。原來今時今日香港又好似重回70、80年代,出街要提防扒手,要小心有人喺街度留意你嘅財物。不過年紀細嘅朋友可能唔知,扒手嘅手法層出不窮,當年就話經常宣傳,希望大家留意扒手技倆,不過宜家可能好多人已經唔記得,甚至太細個唔知扒手嘅手法,不如一齊睇下。

手術鉗夾財物

好似上述嘅案件咁,扒手會用超細嘅手術鉗從你嘅褲袋中慢慢夾出銀包,又稱為「V老篤」(因手術鉗呈V字型)。由於時間較長,多數會揀受害人搭車嘅時候。大家咪掛住低頭玩電話喇,同時勿將銀紙就咁放喺褲袋入面。

跌錢黨

經過受害人之時故意跌散紙,成地銀仔,等受害人分心,可能會幫手執搭,又或者只係分心一、兩秒,就喺呢個時間另一位賊人就會乘機偷受害人嘅袋或其他財物。

倒瀉飲品

同樣二人一組,一個人扮唔小心倒瀉飲品落受害人嘅身人,然後道歉及忙於幫對方抺衫時,另一位賊人就會乘機偷竊。

妙手空空

最高手段,高手賊人只需要埋你身,兩、三秒時間就可以從你身上嘅袋中偷出電話或銀包。多數地點為車站排隊上車、快餐店排隊時候。