《找個可以無話不說的人》

情侶相處之間最珍貴嘅叫坦誠,兩個人選擇得喺埋一齊就好應該坦白向對方分享最真實嘅自己,亦都應該承擔起對方最真實嘅感受。不過講落就好理所當然,但其實好多情侶都做唔到。

對情人講自己嘅嘢講人哋嘅嘢都好易,但講到兩個人之間嘅問題,或者對對方嘅不滿就好難講出口。所以好多人都唔會對情人坦白講呢啲最真心嘅說話,反而就去搵好朋友傾訴,而當事人就被蒙在鼓裏,連自己做錯咩都唔知。  同第三者傾訴都可以渲洩到情緒,但就解決唔到最核心嘅問題。我最怕呢種明明有嘢但唔肯講嘅人,因為積下積下好易就會變成心病,問題無法解決之餘,自己內心對對方嘅不滿又會累積,為乜先?

有個例子就係我身邊一個女仔朋友,佢男朋友每次送禮物都送啲唔啱佢心水嘅嘢,例如過咗期嘅潮物,超實用家品,毫不時尚嘅衣物等等⋯⋯個女仔其實好唔鍾意,但係佢覺得如果開口講唔鍾意未免太港女,所以一直都扮鍾意,另一方面就搵朋友係咁埋怨男朋友無品味唔細心乜乜乜。但其實個男仔由頭到尾都唔知有問題,仲一直以為自己做得好啱,所以佢唔會改,只會一直繼續做,而個女仔就每次都自己係度覺得唔開心,咁樣好咩?

如果你係真心想改善呢個問題,你好應該同當事人講。有啲人可能怕真話太赤裸,或者怕傷害對方傷害到兩個人嘅感情,但其實一個成熟嘅伴侶係應該接受得到赤裸嘅坦白。兩個人嘅磨合都需要兩個人願意坦白分享感受,先可以了解對方嘅喜惡,先可以學識點同對方相處。

港女友