摸鼻假笑?4招睇穿男人講大話

情侶之間間中出現善意謊言,尚算無傷大雅,但如果有人講咗嚴重嘅大話好似出軌咁,另一半知道真相後一定好傷心。唔想後知後覺?最近日本網友「xOTSK」於twitter教大家問一個簡單問題,就可以輕易「識穿另一半出軌」,即學!

如果你覺得另一半最近「怪怪哋」或者成日玩失蹤,可以一試。問之前首先要如常傾計,先撩起對方講「尋日做咗啲咩」,再要求佢講出具體細節,好似「早餐食乜」、「去咗邊」、「見到邊個」等,另一半可能會答得出聽起上嚟好完美嘅答案,不過好戲在後頭!

呢個時候你可以用一條問題KO佢,就係「你可唔可以將尋日發生嘅事,倒序講一次?」如果對方真係講緊大話,一定唔會講得出。喺連續講大話嘅情況下,個腦用哂精力去編緊下一個大話,對於自己啱啱講過嘅大話會造成短期記憶破壞,所以當突然被要求倒轉重複講一次虛構嘅事,基本上大多數人都唔會記得。

想知道對方有冇講大話,仲可以通過一啲微細表情來分辨:

1.假笑

心理學研究表示,長時間(通常5秒)維持一個表情,差唔多都係假嘅。因為真正發自內心嘅表情都唔長,除非情緒達到極點。假笑時,眼角唔會好似真正開心咁出現皺紋。

2.摸鼻

人類個鼻入面有海綿組織,當對方有嘢想隱瞞,鼻就會開始痕,此時就會下意識有摸吓鼻呢個小動作。

3.心虛

說話語速愈快愈急,表示當事人愈焦慮同埋心虛。心虛嘅人講大話時音調會升高,尤其係當你踢爆佢所掩藏嘅真相,佢可能會反過來大聲指責你先係說謊者,掩飾心虛表現。

4.轉移視線及話題

如果佢對你嘅質問表現出不屑理會或不屑回答嘅表情,其實佢只係扮出嚟想轉移你視線,仲會好唔自然咁思考,講一大堆嘢以轉移話題。

圖片來源:日劇<<我的危險妻子>>截圖