【新年泊車抄牌】新年違泊一樣收牛肉乾 咪信網上傳言「新年唔抄牌」

農曆新年就快到喇,大家又要準備四出去拜年!對於有車一族而言,拜年真係兩難局面;一方面揸車成家大細一齊去,全日輪流去港九新界拜年,的確好方便,起碼唔使等車唔使周圍截的士。不過另一方面,同時要為泊車問題而苦惱。大家都知,香港平時都一直唔夠泊車位,好多時平日唔少車都係偷雞泊街過夜,但一到新年就仲慘,去到邊度都放滿死車。好啦,你話奉公守法泊屋苑、商場停車場咩,又肯定要排隊,有時排成個鐘隊,上去拜半個鐘年,真係會畀家人埋怨「早知搭的士啦!」其實每逢過年,駕車人士都有一個存疑,就係好多人話「新年唔抄牌」,所以先周圍泊街,但事實係點呢?

警方講到明照抄牌

其實好似去年新年咁,警方一早開晒聲話新年會照抄牌,事實上喺唔少大型住宅區例如將軍澳、黃大仙、太古城、屯門、青衣等往年都有警方出動派「白色利是」,成條街全部車集體抄牌,所有違泊車輛全部抄晒,一架不漏無情講,所以咪信「新年唔抄牌」。

多封路阻泊車

另一方面,其實好多屋村、屋苑外嘅道路,喺平日都有唔少車違泊,但反而一定新年,呢啲路就會被處方放置雪榚桶甚至拉上黃線,完全封閉唔畀車泊,怕太多人揸車拜年亂泊造成意外,換言之新年嘅泊位係比平日更少!

多人致電警方投訴

大家都知平日泊街唔畀人抄都係警察隻眼開隻眼閉,但如果有人打電話去警局投訴,警方15分鐘內就會有人出現抄牌。而每到新年就因為好多人亂泊車搞到行人唔方便,令唔少人致電投訴,上網睇下討論區,每年仲有一班網民充當「正義使者」,見一次就投訴一次,所以泊街就預咗畀$320啦。