【新年買年花】年花勿亂買 催財催運各有意思 仲要識得揀

踏入新年嘅前夕,各大年宵市場都陸續開業喇,除咗買得意趣怪嘢之外,每年都有唔少都會添置年花,當係好意頭。不過大家揀年花唔好只係睇外表,因為唔同年花都有其寓意,而且當中開花嘅標準都有唔同。

桃花:催人緣

當然最多人知嘅係桃花,除咗催愛情運之外,亦可以催人緣。揀桃花要注意樹枝係咪均勻咁向四邊伸延,桃花嘅花苞要平均分佈於樹枝上。

百合:百年好合

唔好以為只係催旺夫妻感情,其實亦係代表事事如意,好適合家庭擺放。一棵靚嘅百合最好有4至5個花苞,咁開出嚟先會靚。

牡丹:財運亨通

牡丹代表大富大貴,自然代表催財運啦,更有中國玫瑰之稱,為「花王花后」;靚嘅牡丹必會多瓣,花苞夠大夠鮮豔。

水仙:吉祥如意

水仙代表事事如意,亦係好多人挑選嘅年花,水仙必須放於陽光充足嘅地方,3日換一次水,留意水仙有毒,勿與其他植物同放,屋企有養寵物亦要小心。

蝴蝶蘭:幸福滿載

代表幸福及快樂,不過蝴蝶蘭怕凍,一低過15度就好易會成為「銷苞」,即係唔開花;所以購買時最好揀一啲已經開咗7至8成,確保其健康無問題。

富貴竹:花開富貴,竹報平安

一如其名,代表富貴、升職加薪等;一直有爭議認為養富貴竹應唔應該開花,因為有人話開花代表厄運,其實一般富貴竹都會開花,代表花開富貴,毋須擔心。

劍蘭:事事順利

同樣好受歡迎嘅年花,不過非常難養,好似今年天氣太暖好多劍蘭都未開得切花; 挑選時要留意莖底部要濕潤有光澤,必須大棵而直身。

相關文章:

年花篇3:揀年花4貼士 花墟店主教路:花苞要飽滿·葉要挺身

年花貴:年花各有吉祥寓意

【年花失收】劍蘭因天氣暖和凋謝 花農嘆暖化損生計:白做!